2020年3月25號黃昏，本台多個報料群組都有人傳嚟1張照片，指城巴有1名巴士車長腕纏衛生署發出嘅「隔離監察手帶」，卻又身穿城巴制服，並且聲稱嗰名巴士車長正接受隔離時仍然開工。
有市民向本台表示對於呢個消息，感到極為恐慌，擔心有巴士車長罔顧公眾安全，喺懷疑感染新型冠狀病毒（武漢肺炎）嘅情況下，仍然揸巴士接觸乘客，令乘客有機會受感染。
經徵詢本台攝影部人員意見，初步分析指嗰張照片有好大機會係被人改動；有城巴同工向本台表示，今次事件係有人無聊之下玩改圖，本身以為自娛未嘗不可，無諗過會「出咗公海」。
另一方面，據消息人士透露，由於嗰張相片所示事態嚴重，城巴優質服務部已經報警求助。
就網上流傳1張城巴營運貳部巴士車長佩戴電子監察手帶嘅照片，城巴傍晚7點左右發表聲明，指有關圖片並非事實，照片中車長「近日並無離港，無需接受檢疫，身體狀態良好，體溫正常，今日亦有上班。」
城巴強烈譴責「全城抗疫期間發放偽造圖片，引起公眾不必要恐慌嘅不負責任行為」。
城巴、新巴自2020年3月23號開始，會喺巴士車長簽到時測量體溫，要無發燒跡象先至會准許開工，乘客毋須擔心。
Be the first to comment