為乘客 保健康 搭巴士 戴口罩

巴士業職工會聯盟喺11月4號傍晚發出題為《全城車長派口罩、保乘客呼吸健康》嘅呼籲。

根據佢哋發出嘅聲明， 佢哋發起11月6號做「全城口罩日」。

佢哋認為香港人煙稠密、交通擠塞，引致路邊空氣污染嚴重，加上近期「催淚彈放題」令到社區飽受有毒殘留物污染，全部都影響到市民健康。

為此巴士業職工會聯盟呼籲11月6號當日，巴士車長應該戴口罩開工，並且推己及人，喺巴士當眼位置（ 例如錢箱附近或者小型物品擺放處）放定一啲盒裝口罩畀乘客取用。

佢哋重申呢一次係為香港人健康，所以呼籲各位同業盡一分力推廣戴口罩。為加強宣傳呢種保障健康嘅方法，佢哋亦都建議各位同業喺適當位置寫上「保障呼吸道健康，記住戴口罩。歡迎取用！ ^_^」