【香港電車】小薯茄6週年 又包架電車慶祝

近年隨著網絡文化興起，香港人逐漸脫離淨係收睇電視上面「大台」嘅節目，而呢一種新嘅娛樂文化亦都終於為香港帶嚟咗另一種新嘅偶像文化，例如係喺公共交通工具上面刊登偶像嘅生日廣告。

其中由2016年9月正式開始營運嘅小薯茄，喺2021年9月為咗慶祝開檔5週年，決定搵香港電車整返個全車身廣告上#92電車同一眾支持者開心吓。

【香港電車】小薯茄5週年 包架電車慶祝

事隔1年，當蒞到2022年9月，小薯茄慶祝開檔6週年，又安排咗香港電車整返架全車身廣告電車。

為咗隆重其事，小薯茄喺之前舉辦咗「薯茄號電車設計大賽」，得獎設計係由Bonnie Woo提供，放咗喺#170電車上面，一眾小薯茄支持者可以喺電車廣告上面同拎住唔同分紙嘅小薯茄幕前成員打卡，而且車身仲有雪櫃冷笑話同埋小薯茄6周年生日巨型畫，希望以好歡樂、睇落簡單得嚟又好小薯茄氣氛咁渡過6週年！

各位小薯茄支持者可以喺2022年9月6號到10月5號期間，沿著港島北嘅電車軌見到2022年嘅「薯茄號」電車。而喺9月6號首航嘅呢一日，香港電車公司原本擔心天氣酷熱，#170號電車嘅仿冷氣巴士頭幅無得「撞風」入車廂，會令電車車長揸車會好辛苦，起初只係安排「上環←→銅鑼灣」行一兩轉就「收車」，不過結果都有繼續一直行車，畀一眾支持者可以打卡！