【港鐵東鐵綫】「火車」終於可以「過海」！

港鐵喺2022年5月3號公佈，東鐵綫過海段喺當日完成政府審批程序，並且定喺2022年5月15號正式通車。

由當初嘅九廣鐵路（英段）計起，東鐵綫服務香港已經超過111年，隨著過海段通車，呢條本來只係將新界鄉郊連接九龍嘅鐵路將會帶領香港人跨越維多利亞港，直達港島商貿核心，直接貫通新界、九龍、港島；過海路段通車之後，東鐵綫就係香港第4條過海鐵路，由紅磡去會展站車程只需要5分鐘。

延伸過海之後嘅東鐵綫，擴展到全長46公里，共有16個車站，包括新起嘅會展站，同埋以金鐘站做新嘅「尾站」。

會展站位於灣仔北「舊•灣仔碼頭巴士總站」下面，毗鄰香港會議展覽中心，而金鐘站會隨著東鐵綫伸延過海而成為同時可以轉搭4條鐵路綫——東鐵綫、荃灣綫、港島綫、南港島綫——嘅超級轉車站。連同東鐵綫另外3個連接現有鐵路綫嘅轉車站——大圍、九龍塘、紅磡站——港鐵號稱可以令整個鐵路網絡更加四通八達。

港鐵聲稱過海段嘅車站設計各具特色，融入咗唔同嘅藝術、歷史、人文元素。為咗方便乘客可以得到實時資訊選擇慳時間以及舒適嘅車程，全綫東鐵綫月台會提供「車廂載客情況顯示」，而港鐵亦表示會喺金鐘站推出「過海易」月台實時資訊系統，方便乘客選擇過海路綫。

港鐵公司行政總裁金澤培博士表示，東鐵綫過海段可以較預期為早通車服務市民，全賴港鐵同事同埋承建商共同努力，以及相關政府部門同埋社會各界嘅支持。呢條百年鐵路延伸過海標誌著香港鐵路網絡更趨完善，四通八達，為市民帶嚟更方便、快捷嘅鐵路服務。

東鐵綫過海段喺之前經過咗3個幾月測試營運，完成咗所有相關法定安全檢測，2022年5月3號獲得相關政府部門確認運作安全良好，可以正式投入服務。

隨著東鐵綫延伸「過海」，港鐵號稱除咗較早前喺東鐵綫沿綫12個現有車站進行大翻新之外，同時引入咗「全新」列車車隊。港鐵仲提升咗車務安排同埋乘客資訊系統，預期客流喺鐵路網絡進一步分流改善之下，能夠為乘客提供快捷同埋舒適嘅旅程。

一程過海車程時間更快

**（港鐵聲稱東鐵綫伸延「過海」之後乘客慳到嘅時間，前提係逼到入列車車廂同埋唔介意企）**

東鐵綫會為乘客提供多1個「過海」路綫選擇，令到新界市民毋須轉車直達港島。「全新」列車車隊配合新信號系統之下，由上水去到金鐘，一程到埗嘅車程只需要大約40分鐘，比通車前需要轉綫接駁可以慳到最多15分鐘。除咗為乘客提供更快捷嘅行程之外，亦有助提升車務安排效率。

港鐵指金鐘、紅磡、九龍塘、大圍站都會係東鐵綫轉車站，乘客可以因應自己需要揀更快更舒適嘅路綫。對於「過海」乘客，中九龍嘅市民可以多1個路綫選擇，可以揀荃灣綫或者東鐵綫。由紅磡站「過海」去會展站只係需要大約5分鐘，去金鐘站就大約7分鐘。

東鐵綫「過海」之後，作為第4條「過海」鐵路，港鐵認為東鐵綫可以分流其他現有鐵路綫嘅「過海」乘客量，令港鐵網絡整體承載能力得以提升。

加強乘客資訊系統方便選擇上車月台及車卡位置

港鐵自詡一直善用科技提升乘客體驗，而全新東鐵綫亦運用「智慧科技」，作出多項服務提升，包括金鐘站全新資訊系統「過海易」——設置喺金鐘站大堂以及轉車月台嘅「過海易」會為乘客提供金鐘站荃灣綫以及東鐵綫月台嘅實時候車情況，以及隨後2班車嘅班次資訊，乘客可以根據實時資訊選擇更慳時間以及較少人等緊車嘅路綫過海。

港鐵會繼屯馬綫之後喺東鐵綫月台以及 MTR Mobile 提供「車廂載客情況顯示」，方便乘客選擇去較多空間嘅車卡上車。港鐵亦會加強 MTR Mobile 功能，喺「Next Train」功能增設東鐵綫資訊，而金鐘站「站內搜尋」功能，除咗令乘客更容易搜尋到站內設施位置以及步行路綫之外，亦設有語音導航服務方便視障人士使用。