之前講過，2022年，姜濤嘅一班支持者延續上一年做法，搵返香港電車公司，整咗披上姜濤生日快樂全車身廣告喺 #37 電車…而且香港電車公司宣布得到「姜濤香港後援會 KeungShow HKFanClub」嘅贊助，喺2022年4月30號舉辦2022年首個「電車免費乘車日」！
連餐廳門口都見到有「立牌」提醒大家：
每逢「電車免費乘車日」就會多咗好多人搭電車，搞到每班電車都好逼人，甚至令唔少平日本身依賴電車做主要交通工具嘅乘客反而搭唔到電車，呢啲就真係唔需要多講…
講返姜濤生日「正日」同香港電車之間嘅活動：
「姜濤香港後援會 KeungShow HKFanClub」喺2022年係出動披上姜濤生日快樂全車身廣告嘅 #37 電車，加埋 #128 派對電車搞巡遊！
唔止係有得上巡遊電車嘅好興奮，就連搭其他電車經過嘅乘客都要「打卡」！
「姜濤香港後援會 KeungShow HKFanClub」一眾成員更加係「見電車尤如見真人」咁興奮，不論係喺屈地街電車廠，定係銅鑼灣電車總站，片佢哋都紛紛同「姜濤電車」影合照。
至於無抽中可以一齊搭「姜濤電車」巡遊嘅支持者，就…
企滿晒喺銅鑼灣崇光百貨門口！
雖然警方一大朝早就已經重兵佈防，仲拉晒橫額同出埋廣播聲稱「任何超過4人嘅群組聚集會被檢控」，但大家都睇到現場仍然係幾咁群情洶湧！
巡遊時間就係中午左右，來回完屈地街電車廠同埋銅鑼灣電車總站之後， #37 電車就繼續一般載客服務，但…
你以為咁就完呀？
去到夜晚都仲有好多「姜糖」喺 #37 電車「慶祝」，有途經嘅市民話：
「一聽到好多人大聲高叫嗰陣就肯定係『姜叮』嚟緊」
希望街坊無被嚇親啦！
（本文相片由「H.K.T」以及「住喺東涌嘅日本消防員」提供，特此致謝）
Be the first to comment