【第一身現場目擊】膝頂椅背惹起爭執再鎅刀傷人

編按：坊間各傳媒報道一宗發生喺巴士上嘅涉嫌傷人案事發經過不盡不實，連凶徒、傷者嘅身份都搞亂，故特此搵嚟當時曾試圖制服行凶者嘅林姓乘客還原事件。

今日（2022年3月19號）中午約12:50，一輛行走111號線嘅新巴12.8米版本丹尼士三叉㦸E500型雙層巴士（車隊編號：6185，車輛登記：VE7849）由坪石開往中環 (港澳碼頭) 途中，巴士上層發生乘客爭執，主要涉事嘅兩名男子，其間其中一名拿出鎅刀威嚇且隨後襲擊對方至手部受傷。當巴士駛至漆咸道北北拱街站時，凶徒衝出巴士向後逃跑，轉入新圍街往機利士北路逃去無蹤。警方於大約13:00 到場，隨後有救護車抵達將受傷男子送院治療。事有湊巧，我當時正乘坐該班巴士往港島，目擊一切事發經過，並且曾經試圖制服行凶者卻不果。

簡述事發經過

我响新蒲崗登上呢一班 111 前往港島，坐於上層樓梯後右邊第二排座位。涉事的兩名男子 (遇襲的有一位女性親屬同行) 分別在途中上車 (我無特別留意 exactly 邊一個站)，三人分別就坐於右邊車頭的兩排。情況如下圖

當巴士駛過浙江街交通燈後，坐在車頭的男子突然起身擰向後面質問「你頂夠未呀」，「凶男」大聲反搏「頂乜撚嘢呀」。接續嘅大約對話如下：

唔好頂住個櫈背呀
頂到你呀？唔滿意咪坐去第二度囉
你唔可以坐好啲㗎？係都要頂，頂你老母咩
張櫈係咁撚樣㗎啦，你坐去第二度我咪唔頂你囉
咁你坐第二度唔得㗎？
點解要我坐第二度，你坐第二度唔得㗎？
係你頂我櫈背做乜要我坐去第二度呀？
….

當巴士駛至新柳街燈位停車，兩人就開始拳來拳往互毆，期間遇襲男子(被頂的那一位) 突然大叫「屌你老母呀，攞刀！」跟住我就聽到疑似受傷的慘叫一聲，於是準備上前調停。

當我起身離座，見到行凶男子手持嘅係一把相信係 NT Cutter A300R 型號嘅鎅刀 (如下圖同款)

點解我有少少肯定呢款？因為我都用過同款鎅刀，而米黃色刀柄框就係呢款鎅刀嘅 icon，甚至可以話「鎅刀界」獨一無二嘅顏色。

行凶男 (即「頂」的那一位) 起身欲走落樓梯，我亦行近佢，佢擰臉朝向我，不發一言且持刀的右手正在提升，當時距離大約一排座椅，即約兩呎多啲 (如下圖)

我判斷估計「應該啱位」就一腳踢向行凶男嘅右手手腕，鎅刀隨即甩手落地。我正欲再出招之際，佢執返起把刀，我亦稍為後退，事關當時上層所有乘客 (約40人) 視若無睹未有在鎅刀甩手之際「幫拖」而凶徒身形比我更「龐大」，我判斷認為無可能一人之力可以成功制服凶徒。

巴士亦駛至富運大廈對出的「北拱街站」停車，開門，上客，行凶男子就衝落下層，我亦追落去，佢再次亮刀指向我，然後撞開企响車頭嘅乘客衝落車，轉向車尾逃走，我亦衝出車門，唯見車長猶豫欲「當無事發生」開車，我亦在猶豫之間俾佢走甩。

個人估計凶徒年約35-45歲，身高約1.7米，體重無200lb 都 180lb，頭髮微禿。唔是歧視眼光，其外貌、裝束確可予人猜測疑似精神有問題；而且，其隨同物品只有一個裝有未能判斷何物嘅紅色背心膠袋而竟然可淘出一把鎅刀逞凶，實在不能排除其精神狀況有異 ~ 正常情況就算會帶有鎅刀出街都會放在「書包」或手袋入面。

遇襲男乘客及其同行親屬走到駕駛室旁，向車長表示「隻手流緊血」及已經報警，要求不要開車。我亦返回上層原有座位稍事休息。未幾就有乘客要求落車，車長原先表示要等警方到場先可以安排，但陸續有乘客鼓譟，甚至要求車長安排「過車」以無需另外支付車費。約兩分鐘後車長示意其他乘客可以離開，不過並非「過車」而係乘客自行在車站等候下一班車。而由於我有試圖制服凶徒，故暫未有離開。但約三分鐘後，我認為即使要落口供但並非案件調查嘅重點，在徵詢受傷男乘客同意及留下聯絡方法予車長後亦自行離開，乘搭另一班111繼續前往目的地。候車期間有見到警車及救護車到場。

頂櫈背真係唔啱，但好多人唔知道有問題

我曾經遇過「被頂櫈背」，亦有遇上口角 (幸未有動武)，不約而同都有以腿部空間狹窄作藉口「頂」，而我就以「符合法例要求，唔滿意去搵運輸署署長叫佢改例，唔好响度頂」。