疑「A柱」擋車長視線 元朗總站巴士撞老伯

2022年3月1號清晨大約5點50分，當局接到報案，指喺元朗（西）巴士總站發生1宗涉及巴士嘅有人受傷車禍。

根據現場消息，九巴1架行走968號路線前往銅鑼灣（天后）嘅12米版本丹尼士三叉㦸E500 Turbo型雙層巴士（車隊編號：ATENU68、車輛登記：SE3909），當時正載著乘客由總站出發，期間有1名老伯貿然橫過巴士總站嘅行車通道，懷疑因為老伯當時身處巴士車長被巴士「A柱」所遮擋嘅視野盲點，令巴士車長無法及時發現老伯，繼而令巴士撞倒老伯。

車禍後老伯頭部着地並失去知覺，途人見狀報警求助，救護員到場將老伯送去屯門醫院救治，現場遺留老伯嘅1包香煙以及血漬，警員正調查意外詳細原因。

巴士台喺呢度呼籲大家，過路時必須先留意四周情況，唔好同車輛「鬥快」；而大型車輛往往體型大、周圍亦較多盲點，千祈唔好以為「車頭咁大塊玻璃，點會睇我唔到？」；始終論撞擊，人係鬥唔贏車，覺得痛嘅係人、會死嘅都係人，過路前等等，停看聽讓，唔好貪快而影響一生。