【渡輪】中環←→紅磡突停航 只因需要消毒清潔

2020年3月23號，香港運輸署宣布由富裕小輪「中標」「中環←→紅磡」渡輪航線，其後喺2020年6月28號正式啟航。

闊別紅磡九寒暑 中環渡輪復再來

然而坊間一直有意見認為每程收費9蚊削弱咗呢條航線嘅吸引力，實際上每個班次嘅客量又確實偏少，令人擔心富裕小輪會因為大額虧損而「唔玩落去」。

2022年2月21號朝早，富裕小輪突然取消「中環←→紅磡」渡輪航線由0730時頭班船開始嘅所有航班，令唔少人擔心「捱唔住嘅呢一日終於蒞到」。

後嚟富裕小輪發出乘客通告，指2022年2月21號朝早突然停止「中環←→紅磡」渡輪航線只係受新型冠狀病毒疫情影響：

由於中環—紅磡航線有一名船員，按照公司日常防疫程序要求，於今早上班前做快速新冠病毒檢測試時，檢測報告為初步陽性，為確保員工及顧客的健康及安全，按公司的防疫程序，已即時安排該名船員和相關密切接觸人員再到檢測中心進行快速檢測，並重新調配船員盡快提供服務。該航線於2月21日07:30暫停營運，以便對船舶及碼頭進行徹底消毒及深層清潔工作。航班服務恢復時間為15:20，由中環開出。

雖然其後喺碼頭貼有通告指有渡輪機件故障，停靠喺中環碼頭走唔到而令之後嘅班次被逼取消，但都等於話畀大家聽：「公司呢一刻仲運作緊」

「執笠」只係一場虛驚之後，巴士台喺呢度希望各位香港人都考慮一下，其實「過海」唔一定要搭港鐵嘅，不妨考慮吓渡輪服務啦！