【讀者來鴻 / 傑出乘客系列】巴士當係你屋企 別人安全唔使理？

大學返工放工出街玩都有機會要搭巴士，喺車程入面有時覺得百無聊賴，總會搵啲嘢做下，平時都聽得多除鞋捽腳趾、剪指甲、大聲聽歌睇片之類，話說本台近日收到有讀者話有乘客喺車廂做一啲危險好多嘅嘢

拎織針出嚟織嘢

本台編輯聽見有人咁做都「吓？」一聲，仲諗緊邊有人蠢到會唔知巴士喺街行搖呀搖，仲有乘客行出行入好危險㗎？

而又原來真係有咁嘅「傑出乘客」喎！

大家近來都多咗關心巴士行車安全，除咗巴士硬件同司機能力之外，其實要留意返乘客行為同樣係可能危及乘客，就好似今次讀者投訴嘅呢種喺巴士用織針織嘢嘅行為就非常唔要得。

或者有人以為靜靜地無影響到其他人，但織嘢嗰陣織針尖向著人，加上路面狀況千變萬化，可能行車線有凹凸位、可能突發事件令司機要緊急扭軚煞車、可能側邊乘客跣親仆低…作為乘客，手執嘅嘢會為自己同巴士上其他人帶嚟額外危險，呢種行為絕對要譴責！