【好心無好報？】巴士冒煙復溜後 消防車無辜捱撞

2021年11月19號朝早6點18分，當局接報喺寶林北路同翠琳路交界，有1架雙層巴士冒煙。消防將事件列作「車輛起火」，調派消防泵車到場處理。

根據途經嘅巴士乘客所述，涉事巴士懷疑係「中擔」左側煞車系統出問題，現場相片可以見到巴士留有滅火劑痕跡。

但…事件唔係咁就完結。

雖然報稱涉事巴士已經係拉好咗「手掣」，但消防在場處理嗰陣…

涉事巴士突然溜後！

好彩消防泵車停正喺涉事巴士正後方，頂住咗涉事巴士，又好彩當時兩車之間無人企喺度，相信無人受傷，只係消防泵車車頭嘅鋼纜絞盤可能受損。

不過就唔好意思喇，可能搞到消防員哥哥要寫「薯仔文」。