2021年11月18號夜晚11點16分，當局接報喺大圍成運路發生巴士翻側意外，消防第一時間調派田心消防局人員趕赴現場。由於事態嚴重，消防隨即將事件列作「多人受傷」事故，加派救援人員支援。
消息指涉及今次意外嘅係1架九巴12米版本ADL Enviro500 MMC型雙層巴士（車隊編號：ATENU651，車輛登記：TN9417，2015年8月6號出牌，2021年3月驗車合格），之前係行走「掛牌」嘅46X號路線，事發時係「柯打」88K號路線嘅尾二班次。
事發時巴士正係由成運路往大圍，去到出事嘅分岔位原本應該靠右線行駛，懷疑當時司機行錯左線，臨尾發現入錯線，慌忙切回右線時令巴士剷上分岔口中間石壆，繼而向左翻側。詳細原因仍然有待警方進一步調查，並且稍後會檢查巴士行車記錄儀資料。如果有人目擊事發經過，可以致電36611348通知警方新界南交通特別調查隊第二隊。
今次巴士翻側意外造成1死11傷，死者為男性，傷者為9女2男。37歲死者當時坐喺由車頭數起第二排嘅左邊，警方指嗰張櫈無裝上安全帶，乘客喺事發嗰陣成個人被拋出巴士外，再被巴士左邊車身壓住，當場爆頭慘死。
警方表示現場係青沙公路起點，並非交通黑點，車速限制為每小時 50 公里，上橋後按公路標準轉 做每小時70公里。
涉事男巴士司機58歲，2003年入職九巴 ，由2015年開始揸相關路線，2021年初曾經因為一單同輕型貨車輕微碰撞嘅意外而額外上過輔助訓練堂。事發當日巴士司機編更係返「中更」，由下晝4點幾開工，事發前揸咗3「轉」46P 號路線，「放飯」之後改揸1轉88K號路線同埋1轉46X路線，事發時係司機呢一更嘅「尾二轉」。
警方已經落案以「危險駕駛導致他人死亡」拘捕涉案巴士司機。
事發後九巴表示，由2018年第3季開始，新買嘅巴士都有為所有座位裝設安全帶，現時亦已經一直為之前買入嘅巴士加裝安全帶，九巴承諾喺2023年前，為旗下所有幾巴士上層全部座位加裝安全帶。
死者遺體喺2021年11月19號凌晨3點半左右被移走，當局安排恒輝拖車到場將巴士「反返正」，1句鐘後完成，涉事巴士及後由九巴工程車拖走。
Be the first to comment