「邊一種係歐洲最快嘅獵鳥？ 」
1955 年，上面呢條問題引領出創立健力士世界紀錄™——起初只係喺一間健身房樓上嘅房間出版第一本書籍，如今已經發展出一個「全球標記」，並且喺倫敦、紐約、邁阿密、北京、東京、杜拜設有辦事處——公眾唔單只可以通過書籍，更透過電視節目、社交媒體、現場活動得到有關「世界第一」嘅資訊。
健力士世界紀錄™嘅內部諮詢部門會同世界各地企業緊密合作，利用打破紀錄嘅力量，提供獲獎活動以及為業務提供營銷方案，激勵世界各地嘅人——不論個人、家庭、學校、團體、公司、社區甚至整個國家——參與破紀錄活動。
香港電車喺2021年7月30號117歲生日嗰日，同時正式榮獲健力士世界紀錄™榮譽，躍身成為「最大的服務中的雙層電車車隊」呢一項世界紀錄認證！
立足香港島超過一個世紀，香港電車依家嘅車隊入面有 165 架雙層電車接載乘客，縱使喺經歷動盪嘅2019年，香港電車仍然每日平均接載乘客大約 15 萬人次，持續為乘客提供可靠嘅公共運輸服務。
首先，健力士世界紀錄™有為大家釐清返「雙層電車系統」嘅定義：
喺具集電桿嘅軌道上運行雙層電車嘅一套電車運作系統
除咗香港之外，其他同樣運作緊嘅雙層電車系統包括英國黑池、埃及亞歷山卓（亞歷山太港）等地。今次健力士世界紀錄™榮譽唔單只係認可香港電車作為世界性「流動地標」，更加係確認每一位乘客連同香港電車共同締造豐碩成果。
呢一次典禮邀請到一批嘉賓出席，當中包括運輸及房屋局局長陳帆先生、運輸署署長羅淑佩女士、路政署副署長吳偉強先生、機電工程署助理署長（鐵路）陳秋發先生、立法會（航運交通界）議員易志明先生，以及香港旅遊發展局總幹事程鼎一先生。
香港電車董事總經理敖思灝先生連同上述眾人一齊主禮亮燈儀式，象徵香港電車同廣大香港市民一齊成就呢一項世界紀錄。
運輸及房屋局局長陳帆先生致詞指：「好高興能夠見證香港電車獲頒『最大的服務中的雙層電車車隊』嘅健力士世界紀錄™榮譽證書。電車除咗乘載香港市民同旅客外，亦盛載着香港人嘅共同回憶。香港電車不但令港人出行變得方便，更帶動咗本港經濟及社會發展。感謝香港電車所有同事，無論是晴或是雨，都一直全力服務市民。」
另外，同香港電車淵源甚深嘅立法會（航運交通界）議員易志明先生指香港電車為乘客同埋旅客帶嚟獨特嘅搭車體驗：「電車喺路面行駛，站同站之間往往只有大約三四百米，特別適合短途旅程，乘客喺車廂入面能夠靜心欣賞沿途街景，亦容易知道自己身處何地。」易議員祝賀香港電車取得健力士世界紀錄™認證，亦祝願香港電車未來繼續取得成功。
旅遊發展局總幹事程鼎一先生喺典禮致詞中亦分享到：「香港每年都有不少遊客同本地市民一樣，喺雙層電車上感受香港本地文化，置身喺最真實嘅地道體驗之中。呢啲地道文化同深度體驗，正正係旅發局近年來嘅推廣重點。旅發局會繼續透過唔同推廣活動，將呢啲地道體驗展現遊客眼前，並同香港電車攜手合作，將電車呢個具代表性嘅文化標記宣揚到世界各地。」
過往曾經有唔少個人打破世界紀錄，但今次香港電車嘅「最大的服務中的雙層電車車隊」榮譽就係由香港唔少人、物嘅努力匯聚而成——綜合當局資料：
現時香港電車車隊入面所有電車都係由香港電車有限公司裝配，早喺1949年陸續投入服務，並且做過兩次分批更新，只有#28電車（雙層開蓬露台式）、#128電車（雙層半開蓬式）例外——呢兩架電車由太古船塢（Taikoo Dockyard & Engineering Ltd.）製造，喺1954~1955年間出廠，隨後去到1986~1987年間，由香港電車有限公司改裝為出租及派對電車。
現時嘅雙層有蓋式載客電車，官府叫「1987年系列電車」，合共159架，包括#1~#17、#19~#27、#29~#43、#45~#67、#69~#87、#89~#119、#121~#127、#129~#143、#145~#163、#165~#166，全部喺1987~1991 年間製造，底架由W.J. Brown Engineering Ltd.供應，車身由Full Arts Metal Works Ltd.同埋Leeway Engineering and Trading Co. Ltd.供應（前者109架、後者50架）。
此外，香港電車有限公司亦喺2015年改裝第#68電車為復古觀光電車（雙層開蓬露台式，仿1920年款式）、2018年改裝#18電車為特色派對電車（雙層半開蓬式）。
現存#120電車（雙層有蓋式，仿1949年款式）係參照1949年以後嘅電車款式設計，但屬於1991年新製，車身由Leeway提供。呢架有傳統特色嘅電車，亦正用喺普通載客服務。
#88電車（雙層有蓋式冷氣車）係自2016年試行第一部新製用於普通載客服務嘅冷氣電車。
所有電車都採用原裝或香港本地製造嘅車架同埋機電設備，車架來自Peckham、Maley and Taunton、香港電車有限公司、太古船塢。電車摩打由Dick Kerr、Metropolitan Vickers、English Electric生產。
2001年，香港電車有限公司將所有電車（除咗兩架古董派對電車、一架復古觀光電車、一架特色派對電車、一架傳統特色電車外）嘅舊式車速控制系統，改裝成配備無人操控時會自動刹車嘅電子速度控制器或直流斬波系統，並更換全新低煙、阻燃、無毒電線及裝置牽引機車專用嘅電源轉換器。
近年，車隊中嘅載客電車亦開始改裝成為金屬車身服務乘客。
至於無計入載客車隊嘅路軌維修專用車（#200、#300、#400）就係1998年由香港電車有限公司製造，加埋就即係香港電車合共有168架軌道車輛。
呢165架雙層載客電車，由香港電車嘅大約600名員工合作管理同操作，亦有賴每日15萬人次乘客嘅持續支持先至得以存在，香港電車為答謝乘客一同締造「最大的服務中的雙層電車車隊」呢項成就，香港電車安排咗喺兩個電車站設置紀念廣告板，直到2021年8月底，畀各位香港人可以「打卡」共享殊榮：
中環「租庇利街」電車站（#25E）
銅鑼灣「富明街」電車站（#105）
其中銅鑼灣「富明街」電車站（#105）面向商店嘅一面廣告板，仲設有發光裝飾，每日08時到24時會著燈，點亮街道，令大家唔需要等到聖誕節都可以睇燈飾！
誠如香港電車董事總經理敖思灝所言：「電車系統嘅每件機械零件、香港製造嘅每架電車、一眾車長工作時嘅每滴汗水、一眾工匠嘅每個精密決定、每個大眾回饋嘅創新意念同埋選擇乘搭電車嘅信任，以至旅程上展露嘅每道笑容…都係推動香港電車前行嘅原動力。全賴各位一『叮』一點嘅支持，先至能夠成就出呢個屬於你同我嘅莫大成就。」
藉著獲取健力士世界紀錄™「最大的服務中的雙層電車車隊」榮譽，香港電車特別希望向一路陪伴香港電車嘅每位市民致謝。
為咗畀公眾能親手分享呢份榮譽，香港電車陸續推出幾款健力士世界紀錄™官方授權珍藏品：
- 香港電車 x 80M 1:76電車模型-健力士世界紀錄™ 榮譽電車（限量500架，附證書） $268
- 香港電車 x 80M 1:120 電車模型-健力士世界紀錄™榮譽電車 $99
- 香港電車 健力士世界紀錄™榮譽電車八達通卡套裝（限量珍藏版，限量1000套） $290
- 香港電車 世界紀錄特別版酩悅香檳套裝（限量100套） $450
其中電車模型、香檳都已經喺鰂魚涌太古坊康橋大廈1樓ArtisTree嘅「香港電車世界紀錄期間限定店」有售；至於八達通卡就會喺2021年8月9號朝早9點喺北角電車總站開賣，每人限買4套，並且必須以現金付款（但唔收1000蚊紙）。
唔買都去睇吓啦！
2 Trackbacks / Pingbacks