新巴面對由中巴過檔嘅30呎版本利蘭珍寶年事漸高，有需要為上太平山頂嘅15號路線搵替代品，不過因為司徒拔道沿線路窄多彎，加上加列山道天橋有高度限制，所以尋求英國巴士生產商丹尼士協助，生產只有10.3米長嘅三叉戟型巴士底盤，而都普車身廠就配合生產只有4.17米高嘅DM5000型車身，成為香港獨有嘅巴士，一眾巴士迷都叫佢做「矮躉」。
首批40架到港投入服務後，新巴表示滿意「矮躉」嘅表現，所以喺2002年向Transbus International再加訂20架同款巴士，用以取代20輛購自中巴嘅丹尼士飛鏢型單層巴士。
呢20架「矮躉」（車隊編號3341~3360）係全香港最後一批配上DM5000車身嘅丹尼士三叉戟型雙層巴士，當年喺英國裝嵌，用上康明斯 ISMe-335歐盟三型引擎搭配Voith DIWA 864.3E波箱。
時光飛逝，2018年3月26號，新巴招標出售其中10架尾期「矮躉」（車隊編號：3341~3350），同年4月23號招標出售4架（車隊編號：3351-3354）。
而當年同一時間，隸屬城巴非專利部嘅富豪奧林比安11米版本雙層巴士、猛獅NL262 11.7米版本單層巴士因為只配置歐盟2期引擎，未獲當局續牌而需要喺2018年內被強制淘汰而退役，城巴因此引入呢批引擎符合歐盟3期標準嘅「矮躉」去更新城巴非專利部巴士車隊（車隊編號：881~894）。
又再時光飛逝，當局再收緊政策，2020年1月1日開始唔再為歐盟3期嘅柴油商業用車輛續牌，因此喺2020年7月開始陸續退役，由Enviro500 MMC 11.3米版本雙層巴士（車隊編號：9100~9107）、Enviro500 12米版本雙層巴士（車隊編號：8206~8234）取代。
呢批由新巴過檔去城巴嘅「矮躉」，係用喺城巴非專利部，除咗放租之外，最常見到佢哋服務喺非專利居民巴士NR88號路線――即係城巴88R號路線――來往沙田第一城同埋中區政府碼頭。
其中嘅焦點巴士應該非#887莫屬，因為咁多架由新巴過檔去城巴嘅「矮躉」之中，只有佢仲係用返原本嘅Hanover電子顯示屏。
隨著臨近全數退役，相信都難免吸引一班巴士迷追逐「送殯」，總之大家注意安全，唔好打擾一般乘客，同埋留意天氣，小心身體。
1 Trackback / Pingback