肺炎逆境未末路 水晶巴士回征途

2020年伊始，一種所謂「新型冠狀病毒」（武漢肺炎）旋即肆虐全球，多國實施出入境限制，令世界各地旅遊業飽受打擊。

例如「國際知名」嘅城市觀光巴士集團「大巴士」（Big Bus Tours），早前已經暫停佢哋喺全世界多個城市嘅業務。

面對肺炎大疫情 「大巴士」都業已停

至於一啲本土旅遊巴士公司，例如香港嘅「水晶巴士」，當然亦難免受到影響。只不過，除非公司只依賴單一市場、單一客源，否則其實唔會一下子就全軍盡墨嘅…

「水晶巴士」一向標榜「美景．美食團」，表面上係一門觀光生意，但只要略作變通，就唔只一條門路維持業務。

正當香港政府宣佈放寬社交距離措施，市面由一潭死水中希冀曙光之際，「水晶巴士」得到「保誠保險」一份租賃巴士合約，由2020年9月22號開始，「保誠保險」會租用「水晶巴士」嘅「2號車」作為流動推銷車。

首日就係去到尖沙咀海防道臨時街市對開，「保誠保險」嘅業務員喺行人路上遇到有興趣投保嘅市民，可以邀請佢上到巴士詳細解釋合約條款之類嘅細節。

有途經嘅市民指除咗個牌頭比較可靠之外，相比另一間近年「求其租個爛舖位」嘅「中____」保險公司，咁樣睇落都會有信心啲啲。

雖然話「保誠保險」會有一段時間租用「水晶巴士」嘅「2號車」作為流動推銷車，但據悉唔係每一日「保誠保險」都會出動，不過可以講吓：9月23號1400~2000係去大圍一帶，睇吓大家有無興趣昅昅喇！

至於講到日常嘅觀光業務，「水晶巴士」嘅代表就話「已經恢復緊」，現階段會係安排每週末一班，顧客要先預約訂座，反應理想，部份週末要加開班次…包車業務亦見好轉，「依家啲家長好捨得用錢落小朋友身上」，佢笑言「有人已經連續3年包車團同個仔慶祝生日」…

或許大家都未使為未來擔憂？