2020年7月29號，香港政府又利用「抗疫」之名，開始實施「全面禁止所有食肆容許食客『堂食』」嘅政策 ，令到香港呢個堂堂「亞洲國際都會」嘅唔少打工仔被逼喺街頭食飯。（ 不過都唔知算唔算好彩，政府睇到民怨沸騰，好快就唔再強迫全日禁止「堂食」。）
主力提供港島區專營公共巴士服務嘅新巴城巴，面對全面禁止「堂食」呢一個政策嘅時候，隨即安排每日10:00~20:00喺部份巴士總站站頭放置巴士做「員工休息車」，畀佢哋嘅前線員工有一個「有瓦遮頭同埋有冷氣嘅地方」可以食飯。
話說當日本台派員走訪部份有放置巴士做「員工休息車」嘅巴士總站，期間有巴士車長表示 ，巴士公司擺幾架雙層巴士喺巴士總站長期開住引擎「煲冷氣」，確實令到佢哋可以有比較好嘅地方休息同食飯，但佢哋亦提出「點解唔去試下將嗰啲充電嘅電動巴士擺落站頭？」，認為起碼可以避免持續空轉引擎，減少積聚油渣廢氣喺巴士總站入面。
結果…其實第2日（7月30號）已經有消息指城巴安排充電嘅電動巴士去部份巴士總站站頭做「員工休息車」，有巴士車長表示歡迎公司接納前線員工「隨口噏」嘅建議，雖然只係簡單諗住「減少直接吸廢氣」，但無諗到公司有尊重佢哋嘅意見。（當然可能只係大家一廂情願諗多咗 （●v●））
本台派員喺7月31號再去到中環視察一下「員工休息車」嘅情況，發覺喺安排擺放「員工休息車」嘅中環碼頭同埋交易廣場，原本嘅油渣引擎巴士都改為充電嘅比亞迪K9R型電動巴士。
值得一提既係，中環碼頭擺放「員工休息車」嘅位置就係喺站長室旁邊，而交易廣場巴士總站本身就係一個建築物底下有蓋嘅巴士總站，通風未必及得上空曠嘅巴士總站――喺呢2個地方嘅「員工休息車」如果用返普通油渣引擎巴士，為咗「煲冷氣」而長期開住油渣引擎，不論係油渣廢氣或者噪音，其實都會對週邊工作嘅前線人員造成困擾。
雖然嗰幾架電動巴士經常被人笑佢哋係「流動炸彈」，但佢哋充好電之後，可以乖乖地咁喺度「煲冷氣」而又無乜出聲同埋無自己即場排放廢氣，確實都算做到實事。
更加重要嘅係今次嘅改動可以令到前線員工體會到公司管理層係「從善如流」， 無疑係會令到更多員工肯同公司共度時艱。
順帶一提，另一邊嘅九巴，7月30號開始曾經派員去到3個有蓋巴士總站，擺櫈畀一般市民可以喺巴士總站入面用膳。
不過據NOW新聞台喺8月3號嘅新聞報道入面透露，九巴因應政府「全日禁堂食」措施，午膳時間喺3個有蓋巴士總站擺櫈畀要開飯嘅市民使用，事後運輸署就發信指九巴事前未有通知署方就將「私人物件」放置喺政府土地上面，直斥九巴有關做法係「未獲授權」。
運輸署回覆NOW新聞台查詢時就指，巴士總站屬於政府土地，如果營運商想用巴士總站部分地方做其他用途，需要得到有關部門批准，但同意及感謝九巴相關做法。
究竟係咪有人「循例要做返個樣」、「寫幾隻字滿足自己上面班大佬」呢？姑且唔多作揣測，但又咁講，推論落去，新巴、城巴喺巴士總站放置巴士做「員工休息車」…其實係咪都算係「未獲授權」用巴士總站部分地方做其他用途？運輸署…等緊你出信㗎！定係你搵緊外判去拖車？
Be the first to comment