【日本巴士？】大正時代「古董巴」 或列日本「文化財」

正當香港巴士迷吹捧緊一啲香港舊巴士重出江湖之際，日本東京都就為日本當地巴士歷史做緊更重要嘅決定。

現時東京都交通局收藏有1架「円太郎巴士」，屬於大正時代當地共用車輛，即係公共巴士嘅雛形――日本文化廳嘅文化審議會喺2020年3月19號上書日本文部科學大臣，將「円太郎巴士」列入日本「国の重要文化財」，預計經過正式審議後，喺6~9月期間可以作出正式「指定」。

「円太郎巴士」其實只係1個「花名」，正式講佢係叫「東京市営乗合自動車」，車身全長4.6米、高2.3米、闊1.6米，車上可以坐到11人，當時係由東京市電気局負責營運呢種車輛作類似公共巴士之用。

簡單講吓個起緣，可以追溯返去1923年嘅「關東大地震」，嗰次地震對東京造成廣泛破壞，東京都心嘅路面電車服務無法恢復――有見及此，東京向美國福特購入800架卡車，經過改裝加設木製「車廂」，自1924年1月開始，以東京站為起點，提供2條分別去巣鴨、中渋谷嘅路線，展開日本第1個現代公共巴士服務。

至於「円太郎巴士」呢個叫法，就係源自明治時代嘅落語家「橘家 圓太郎」：佢哋叫以前啲公共馬車做「円太郎馬車」。

講返今次嘅主角，其實佢係東京都交通局唯一仲收藏緊嘅「円太郎巴士」，相信亦係日本最古老嘅「公共巴士」。東京都交通局負責人表示，「呢架車貴重之處在於佢對關東大地震後肩負咗復興支援嘅重任」。

反觀香港呢~（以下開放討論）