因為長期人手不足，長崎自動車（通稱「長崎巴士」）宣佈調整班次，引起咗好多乘客嘅不安。
由2026年10月開始，部分路線喺星期六、日同埋公眾假期開始減班，同時亦決定喺2027年4月取消4條路線，全部都係喺市內運行，總長度大約有16.93公里（合共28個巴士站）。當地居民擔心呢個情況會嚴重影響日常生活，紛紛要求長崎巴士同埋長崎市政府維持路線或者確保有替代嘅交通工具。
決定取消嘅4條路線（附：車程、巴士站數目、平均每日乘搭人次）包括：
- 亞古里之丘線（あぐりの丘線）：2.25公里、3個巴士站、5.8人次
- 千千線（千々線）：9.32公里、8個巴士站、41.0人次
- 海風線（うみかぜ線）：2.44公里、10個巴士站、581.2人次
- 西崎團地線（西崎団地線）：2.92公里、7個巴士站、130.1人次
根據「長崎新聞社」嘅報道，2026年10月15號晏晝，記者見到原本行駛緊長崎市北部「錦町——住吉台・住吉の杜線」嘅小型巴士停咗喺西町集會所前巴士站——因為2026年10月開始調整班次，呢條線喺星期六、日同埋公眾假期已經無得搭喇。
有個行路要用拐杖嘅60幾歲男士話，佢平時會坐呢架巴士去買嘢或者去戲院，佢嘆咗口氣話：「如果減班嘅話，出門口嘅機會都少埋。」
附近公營住宅嘅自治會長、69歲嘅德永義博就話，因為減班嘅關係，佢聽咗好多自治會入面啲老友記講對生活感到不安——「交還咗駕駛執照之後就話巴士停運」、「去唔到住吉嗰個會堂開會」——聽講嚟緊春天會取消4條路線，令到呢股不安感更加雪上加霜。佢仲話「呢啲嘢唔係『關人×事』。會唔會有一日，我哋條條線都面臨同樣嘅命運呢？」——呢種疑慮一直揮之不去。
調整班次嘅背後原因係好嚴峻嘅「司機荒」。實際需要嘅巴士司機人數仲爭大約20~30人，而且做緊嗰班亦都無可避免開始老化，請人嘅速度仲係追唔上退休嘅速度——而呢種情況預計未來都仲會持續落去。
長崎巴士決定嚟緊2027年春天取消嘅4條路線入面，最多人搭嘅就係「海風線（うみかぜ線）」。呢條線行經戶町周邊同埋市中心，屬於長崎市南部一帶、成條線有2.44公里長，10個站，平日平均1日大約有581.2人次。不過由2026年10月開始，星期六、日同公眾假期已經開始減班，仲決定咗喺2027年4月正式取消。
沿線嘅二本松自治會會長、79歲嘅臼井鴻三同埋自治會一行人就喺2026年10月19號向長崎巴士提交咗大約1 400個反對取消路線嘅簽名，同埋1份要求研究替代交通工具嘅請願書。
而早喺2026年10月9號嗰日，佢哋亦都向長崎市政府提交咗請願書，兼且閉門會見鈴木史朗市長，要求行政部門、巴士公司同埋當地居民三方一齊商討對策。
長崎市政府同埋長崎巴士雙方都話，好「重視」市民嘅心聲。長崎市政府已經同二本松地區嘅居民開咗座談會，一齊商討替代方案。
日本其他城市，有引入共乘的士或者社區巴士嘅成功例子。長崎巴士嘅負責人就話：「喺能力範圍之內嘅部分，我哋會盡量配合。」
距離路線取消仲有半年時間，臼井會長掩飾唔到佢嘅焦慮，話「居民依家都好驚、好不安」。雖然佢堅持要求維持原有路線嘅諗法無變，但亦都強調話：「我哋真係要用最快嘅速度去研究替代方案先得喇。」
Be the first to comment