校巴終於第一滴血了

唔係有專門做校巴生意嘅公司結業，而係終於有家長表示佢嘅仔女就讀嘅學校，下一學年無車公司承接校巴服務，著家長們自行安排仔女返學嘅交通。

本台過去曾經講過校巴經營困難嘅問題。事隔幾年，據業界中人所講，關於錢同「服務要求」嘅情況當然無明顯改善，就算無伊朗戰事造成油價飊升，校巴服務已經唔止係雞肋，更唔止係無肉食，幾乎係蝕住做。而出生率連年下跌，導致「殺校」之餘，搭校巴嘅人數都急劇下跌，過去主力做校車嘅旅遊巴公司都紛紛尋求其他出路。

在「供」同「求」都下跌嘅情況之下，而家長堅持繼續做「鹹魚」、學校為免「飲廉記咖啡」或捲入被殺校漩渦亦只好遷就以至縱容啲老豆老母話之校車公司死活，校車公司見到家長們打算支付嘅車費無法抵銷成本嘅時候，唔入標或只以「收回成本」但家長接受唔到嘅車費入標，最終無校車接送啲父母眼中嘅「鑲金的菠蘿」，就是必然嘅結局。

事實上，三年前嘅撰文已經引述過有車公司負責人揚言「請唔到司機保母的話，你自己諗辦法送個細路返學啦」但為人父母者仍然只圖「一毫子搭撈屎 (Rolls Royce)」嘅態度、思想，無公司承辦校巴呢個局面，絕對係怪獸家長自招的。

至於有網民謂「FB 有 group 可以湊車」呢樣嘢我哋就不加評論，只可以講，家長原本打算有如專車接送佢哋嘅鑲金的菠蘿，淪為有如昔日紅van 模式，並車費可能仲高過原本嘅校車公司話要加價後嘅水平，只好送一句好老土嘅諺語

偷雞唔到蝕渣米

後記：上面 screenshot 嗰位 Simon W.S. Chan，除咗係保險從業員之外，原來仲係粉嶺區開補習社嘅陳偉勝先生。嗱，唔係特登做高登起底組，只係佢個 account info 寫明「綠草地教育」創辦人，咪當係同佢宣傳吓囉。不過咁，為人父者得到呢個局面，算唔算係天大的諷刺，留白各位看倌自行判斷。