勝利二型豈止是出賣年齡嘅回憶

恒生大學嘅「勝利二型重現校園」展覽完咗都十日過外，關於呢款可謂香港巴士經典之最嘅討論，雖然已減慢落嚟，但又未有完全停止。最普遍嘅討論角度，離不開昔日乘搭嘅「童年回憶」，有正面亦有負面。這都很正常，但最重要嘅係未見有正、負兩邊的指罵、吵鬧。

作為一個由小學生開始搭勝利二型嘅 Uncle，講緊唔止 G5至G543 未搭齊晒都搭咗大半，仲有係依家荃灣大會堂花園嘅荃灣碼頭上車嘅33，依家沙田廣場嘅沙田墟上車嘅48，响新之城嗰度嘅西洋菜南街做總站嘅33M，友愛邨愛明樓側嘅60，西樓角路擺街、上客後要兜到去依家嘅華都中心先至出返青山公路入屯門去定德樓側邊嘅60M，亦的確係充滿出賣年齡嘅回憶。

再到後來近呢十幾年，做咗唔少歷史考古，加上識咗一位對呢款車嘅機械極度熟悉嘅大師，唔止對勝利二型嘅認識深咗好多，更發現呢款車嘅價值，並不止在於老人家 MODE 嘅想當年、童年回憶，涉獵嘅範疇非常之廣泛，唔止响香港，仲有响英國。

十日前完結嘅展覽，我個人認為最重要嘅就係將復修嘅過程同艱辛展示於參觀者面前，俾參觀者能親感受同埋親自見證返呢款為香港立下汗馬功勞而全球獨有嘅巴士嘅價值所在。

縱然仍然會有人拎啲意外新聞嚟SPIN 呢款車嘅「社會價值」是否如我哋呢啲阿叔阿伯所吹噓，可以講，若了解返勝利二型嘅機械特性 vs 佢之前普遍嘅車款，勝利二型嘅價值真係難以就此抹煞。