【印度】德里旅遊局推出雙層觀光巴士服務

印度德里政府喺2026年2月27號正式推出名為「Dekho Meri Dilli」嘅電動雙層觀光巴士服務，旨在為遊客提供印度國家首都轄區主要歷史遺跡以及地標嘅遊覽路線。

德里首席部長雷卡古普塔 (Rekha Gupta) 連同德里旅遊部長卡皮爾米甚拉 (Kapil Mishra) 以及其他高級官員喺拉菲路 (Rafi Marg) 為呢架63座電動雙層巴士揭幕，隨後一齊乘搭呢架巴士前往總理博物館。

德里政府聲明指呢架全電動巴士由德里旅遊局以公私合營模式推出，配備現代化設施、先進安全功能以及全景上層，旨在為乘客提供更佳觀光體驗。

呢條電動雙層觀光巴士係德里旅遊局同欣杜賈集團（Hinduja Group）合作，專為印度國內外遊客設計，沿着固定路線營運，涵蓋德里市中心主要地標，包括：

德里哈特市集（Delhi Haat）
勝利廣場（Vijay Chowk）
總統府（Rashtrapati Bhavan）
司署總部（North Block and South Block）
國家博物館
國家現代藝術館
總理博物館（Pradhanmantri Sangrahalaya）
國家戰爭紀念館
印度門

呢款巴士係由SWITCH Mobility生産嘅SWITCH EiV 22型，配備231千瓦時嘅鎳鈷錳酸鋰電池組，附有液體冷卻系統，續航力250公里，可以經650伏「雙槍」充電。車廂唔計司機可以容納63名乘客，設有冷氣，設計適用於德里地區，唔會受到架空電線或低矮樹冠嘅影響。

巴士服務頭班車喺每日09時由德里哈特市集-INA（Delhi Haat-INA）車站出發，先以日間運作為試驗，尾班車預計大約18時返回哈特市集-INA車站，但目前亦正在規劃夜間遊覽線路，路線已經基本確定，出發時間將會根據沿線博物館嘅閉館時間進行安排。

巴士上會有1名訓練有素嘅導遊，為乘客講解沿途景點嘅歷史以及文化意義。有意乘搭嘅旅客可以透過德里旅遊局網站上網「買飛」，亦都可以喺德里全市指定售票處購票：

成人票價：500盧比，另加5%商品服務稅（GST）
5~10歲兒童票價：300盧比，另加5%商品服務稅（GST）
5歲以下兒童：免費

德里首席部長古普塔表示，建立雙層觀光巴士服務旨在將德里創造成為現代化世界級旅遊目的地，同時彰顯德里嘅歷史文化遺產。佢亦表示，德里呢座城市融合咗眾多歷史遺跡以及現代地標，例如舉辦過G20峰會嘅巴拉特曼達帕姆（Bharat Mandapam）、新議會大廈等，畀遊客能夠在一次過遊覽德里發展嘅唔同階段。至於電動巴士就彰顯印度政府重視綠色旅遊、清潔旅遊，並且有望提升遊客體驗嘅同時減少路邊碳排放。