港鐵2026年起禁止攜帶電動可移動工具進入鐵路處所

港鐵公司表示，安全係營運鐵路嘅首要任務，港鐵會不時進行風險評估，並且按照安全，考慮更新鐵路範圍内嘅規定——鑑於電動可移動工具潛在嘅火警風險為鐵路安全帶嚟挑戰，港鐵經過審慎風險評估後，公布2026年1月1號開始禁止乘客攜帶電動可移動工具進入港鐵範圍。

現行嘅《香港鐵路附例》、《香港鐵路（西北鐵路）附例》以及「運載行李條件」都已經禁止乘客喺港鐵範圍内使用電動可移動工具，包括電動單車、電動單輪車（俗稱「風火輪」）、電動滑板車、電動平衡車、電動滑板以及電動行李箱等。唯一獲豁免有關規定嘅只有使用電動輪椅嘅殘疾人士。

2026年1月1號開始嘅新規定，除咗現時已經獲得豁免嘅殘疾人士使用電動輪椅之外，乘客一律禁止攜帶電動可移動工具進入港鐵範圍。一般嚟講，呢啲電動可移動工具都配備高容量鋰電池，而部份可移動工具亦體積龐大，有可能阻礙通道、對其他乘客造成不便。港鐵進行審慎風險評估之餘，同時亦參考咗其他鐵路系統嘅相關做法，因此更新港鐵「運載行李條件」，並會喺車站張貼告示提醒乘客。

港鐵公司副總監——車務營運及本地鐵路李婉玲女士表示，港鐵一直致力維持營運安全，港鐵會加強留意有關情況，亦呼籲乘客自律以及遵守相關規定，共同維護一個安全以及舒適嘅搭車環境。

港鐵人員如果發現有乘客攜帶電動可移動工具，會向乘客發出書面警告，以提醒乘客必須遵守相關規定，以及要求乘客離開港鐵範圍。職員喺有需要時，亦可以向違規乘客發出「擬檢控通知書」。如乘客見到有其他乘客攜帶電動可移動工具，請即時通知職員以便作出適當跟進，共同締造安全乘車環境。

乘客可以喺港鐵網頁查閲更新版「運載行李條件」第1.4條，了解相關規定。