城巴龍年賀歲拉花巴士出動 引領乘客「飛龍騰達」

隨著困擾全世界嘅3年疫情過去，2024年香港迎嚟疫後首個農曆新年，各大專營巴士公司繼續按照傳統推出當年生肖主題嘅全車身拉花巴士。

繼早前新大嶼山巴士破天荒使用單層巴士作為生肖主題巴士之後，作為城巴同新世界第一巴士兩間公司巴士專營權合併後嘅首個農曆新年，合併巴士專營權後嘅城巴搵到香港本地知名藝術組合 FAF Finger And Fish 用「飛龍騰達」做主題，創作出2024甲辰龍年嘅賀年生肖主題巴士。

2024甲辰龍年城巴會推出兩架巴士披上生肖主題嘅全車身拉花，呢兩架題為「飛龍騰達」嘅巴士包括：

12.8米版本Dennis Trident E500 Turbo（車隊編號：63861【前・6862】，車輛登記：WR4068），城巴機場快線A11號路線

12米版本富豪B8L（車隊編號：52101【前・新巴5231】，車輛登記：WN4213），紅隧過海巴士101號路線

（車輛或會因車務狀況調離，一切以城巴公布為準）。

如果想「野生捕獲」呢兩架「飛龍騰達」巴士，唔需要靠「社經地位」搲人嘅，城巴特意喺流動電話應用程式入面增設「龍年主題巴士」標籤， 只要嚟緊嘅班次獲派以上兩架「飛龍騰達」賀年巴士， 實時抵站預報系統即會自動顯示相應標籤，只要睇住應用程式就可以搵到佢哋㗎喇！

除咗「飛龍騰達」賀年巴士，城巴仲同藝術組合聯手設計別具特色嘅賀歲揮春。由2024年2月2號開始，城巴會有揮春派發活動，乘客可以去城巴位於港九新界各區嘅主要巴土站以及公共運輸交匯處，接收呢份賀年祝福帶返屋企。