【唔係電的環保】 倫敦 Routemaster 巴士採用「薯條油」碳排放減九成

眾所周知，全世界在猛力吹捧電動車，筆者就成日拎住鋰礦開採同廢電池嘅污染問題力排眾議大唱反調，只不過石化燃料汽車，尤其是油渣車，持續被針對於死氣喉嘅問題，亦確有需要尋求解決方法。生化柴油或本文「主角」，响外國有俗稱 Fish & Chips oil 嘅 氫化植物油 (hydrotreated vegetable oil 簡稱 “HVO”) 响香港無得賣 / 唔知點樣買，因而無人會為意有啲咁嘅嘢同埋其減排成效，但响歐洲唔止普及咗好多年，亦有唔少科學研究同行駛測試取得良好結果。最近响英國倫敦經營倫敦復古巴士路線 T15 嘅 Londoner Buses 亦取得滿意測試成果，週前宣佈全部10架用於 T15號線嘅 AEC Routemaster 轉用 HVO。

綜合包括巴士傳媒網站 Route-One 在內等來自英國嘅消息，Londoner Buses 响去年10月安排從 TfL 接收過嚟，換上咗 Cummins B5.9 引擎嘅 RM1941 進行為期三週全入 HVO 行駛嘅測試，結果發現機械運作當然無問題，且耗油量略有改善，响聖誕前夕宣佈旗下嘅 AEC Routemaster 全線使用 HVO，以實質方法推動環保減排。

Londoner Buses 母公司 Transpora Group 董事總經理何禮昇 (Rhys Hand) 表示，雖然旗下嘅 AEC Routemaster 獲得交通部發出豁免低排區 / 超低排區禁止駛入限制，但在接手「古董巴線」經營權嘅時候承諾會盡力提升環保水平，因此一直尋求「另類能源」改善 AEC Routemaster 嘅排放，「依家終於搵到切實可行嘅方法將幾十年前人類還未知何謂環保嘅時期出現嘅古董巴士，如今能與環保減排並肩同行，我們為此引以為榮。」

何謂 HVO？HVO 係將植物食油，通常係菜籽油、芥花籽油、葡萄籽油，放入「反應堆」設備內注入氫氣進行處理，目的係使煮食過程中嘅高溫可能導到異化咗嘅油脂嘅碳鍊結構得以還原，與及阻止氧份子改變油脂嘅碳鍊結構，使能維持其可用作替代柴油需要嘅化學結構。因為 HVO 於理論上無需如生物柴油 (Bio Diesel) 提煉過程要混入石化燃料、甚至要以「新鮮」榨取嘅食油為主，HVO 有更佳嘅處理效果、更具環保效益。

HVO 如何有效達至減排？响歐美嘅科學研究發現，HVO 嘅質量密度較柴油低約 7%，加上其份子嘅碳鍊結構形成嘅特性，令到响引擎氣缸內產生更佳嘅燃燒效果。 另由於近乎完全代替化石燃料嘅使用，因此在所謂「碳排放鍊」嘅理論計算，HVO 產生嘅減排成效達至90%。順便講，過去曾閱讀過文憲資料，歐洲測試 Euro 3 或之前嘅車用生物柴油而廢氣水平升至甚至超越 Euro 4，一直唔明如何達成，如今總算搵到初步答案。

不過所謂「針無兩頭利」「凡事有代價」，不論 Bio Diesel 或 HVO 箇之然同糧食供應存在矛盾，即使HVO 可集中以廚餘為原材料，但英、美均有學術研究認為「始終存在經濟誘因」可能驅使食肆增加食油嘅使用量，因而加重可提煉食油嘅農作物嘅需求，影響全球宏觀嘅糧食供應，以至加劇棕櫚樹種植破壞熱帶雨林。雖然如此，至少睇到响「電」之外唔係無改善汽車廢氣污染嘅方法，與及比起一眾環保份子持續迴避由採礦到電池「玩完」連同電能生產嘅污染問題，對於 Bio Diesel / HVO 嘅應用研究至少無做偽君子。

而集中返於 AEC Routemaster 去講，在一眾左膠叫囂環保及所謂殘疾人士權令到前首相約翰遜 (Boris Johnson) 在出任倫敦市長時應運而生嘅 RouteMONSTER (New Routemaster) 因為油電混能驅動系統嘅可靠性及維修成本而提早退役，相比之下「電」好大可能只係大笑話。

無論如何，AEC Routemaster 使用 HVO 成事，相信係巴士迷樂見之事，除咗去倫敦旅遊嘅「朝聖行程」能夠持續落去，亦見到舊巴士嘅保存算係少咗一重阻力。