伊朗戰事持續導致油價持續攀升，最大影響嘅其實係運輸行業，貨運物流行業就紛紛加咗價，但客運行業就唔好意思，撇除行內存在已久嘅「內捲」，即係割價促銷惡性競爭，因為只係針對旅遊行業、散客車租，一般常規性嘅業務，即是村巴、校車、廠車，價錢一早响簽約時定好咗，甚至村巴嘅收費受政府規管，想加都無得加，响目前油價升幅可謂進入瘋狂嘅狀態之下，唔蝕錢真係偷笑。
主要經營村巴嘅 ABC 旅運日前响其Facebook 出 post 宣佈要減班，但隨即收到運輸署嘅警告「不得擅自調整班次，否則最嚴重嘅後果係『釘牌』」，唯有硬著頭皮「燒銀紙」。而主力於校車業務嘅豐裕旅遊車亦都接受傳媒訪問，直指油價已經去到難以抵受嘅地步。有議員馬上衝出嚟指「政府點都應該要做啲嘢，穩住業界嘅經營，避免觸發倒閉潮」。可是，回顧戰事爆發以來，偉大的中国香港特区政府做過嘅只係一件事，同油公司協調，增加油價調整嘅透明度云云。直接啲講，即係做咗等如無做。
唔同大家計燃油成本嘅數，講一個好簡單嘅道理。其實戰事爆發以來，坊間對油價嘅討論，除咗根本「講嚟都係廢話」嘅乜叉「油公司合謀定價可恥」之外，多咗一個可以話新嘅論調：
政府話香港啲油都係嚟自「內地」，即係同珠海、中山啲油站嘅貨源一樣
點解香港嘅油價會比珠海、中山貴咁撚多?!
唔好意思，原諒真係要粗口字直出，咁先至夠晒傳神。傳神之處，唔係坊間對油價嘅怒火，而係幅度，即係差價嘅距離。
有人指出，跟牌價相差一倍。但事實上，呢個講法係唔公道，因為香港油站嘅電油牌價係包括咗每升 $6.06 嘅燃油稅。早前响 HK Car Channel 網站嘅撰文，連埋曾經係香港汽車燃料主要來源地嘅新加坡做咗一個「徹底還原計算」嘅比較，即係將香港、珠海、新加坡嘅稅項，同埋一般零售層面可以享有嘅折扣優惠，全部減去晒，做一個完全 Apple to Apple 嘅比較，結果發現，RON98 電油香港嘅價錢，比「內地」貴接近 HK$10.0 一升，比新加坡貴接近 HK$7.0 一升。
文章肯定咗油公司係謀取暴利㗎喇。不過，暴利嘅背後，其實仲有一個根源因由 – 油站地價。打從2000年地政總署更改油站土地承租制度之後，25年以來油站嘅承租地價升幅超過5倍。根本香港車用燃料價格之高嘅主因呼之欲出。
講返客運行業嘅困境。加價可以話無可能，即係客運業界只能硬食。但持續落去真係不排除嗰位議員嘅烏鴉口一語成讖。網上有人就提出「不如減燃油稅啦」……
但呢位網民唔知匿咗响山窿幾多十年，巴士用嘅柴油免稅咗近嚟二十年喇！
即係政府無嘢可以做？或者先引用返「民間智慧」比較返香港同中山、珠海嘅柴油價格，仲要用最實在嘅「折實淨價」去做比較，做一個可謂最公平嘅比較。
絕大部份旅遊巴公司都可以同油公司申請到「車隊折扣」，我哋明查暗訪獲得嘅資訊，折扣後嘅實付金額，介乎 HK$13.0 – HK$14.0 一升。講明先，唔一定100% 準確，唔好响度抽秤啲數據「流料」。要明白商業運作嘅嘢…. OK?!
廣東省嘅国六柴油平均「牌價」介乎每升8.55 – 9.05人民幣，減去大約 2.30 人民幣嘅稅項，平均「淨價」為人民幣6.60。
折算港紙每升 $7.54
即使計入要運嚟香港嘅跨境運費成本，預計大約 HK$8.0 一升。即係話仲有 HK$5.0 至 HK$6.0 嘅差距。
又想講「合謀定價」？唔好意思，市場學同經濟學都有教，當商品來源成本無明顯差距，售價亦相差無幾實屬正常情況。
前段提過，引述返响 HK Car Channel 嘅撰文，油公司暴利嘅背後，應該係要嚟支付「25年嚟升幅超過5倍嘅油站地價」。若果話HK$5.0 至 HK$6.0 嘅差距最終係透過油站地價落入庫房，係一個合理嘅推論。
柴油無燃油稅，响一般正常嘅公共行政程序角度，的確偉大的中国香港特区政府係無嘢可做。不過，不論嗰位議員或是業界嘅希望，都係設法降低油價。說穿了，相對外國或偉大的祖国都有嘅「燃油補貼」就是解決方法。而既然「認真地還原算式」得出油站地價該是問題源頭，如今响運輸行業，特別係客運行業水深火熱之際，地政總署「嘔返出嚟」，可能係符合箇中道理?! 只不過「補貼」制度套用香港嘅公共行政制度同運作模式，會係一種特事特辦，唔知尊敬的特首會有乜嘢睇法。
假設偉大的中国香港特区政府真係會做，唔該仲要設立有效機制，防止油公司「食夾棍」將呢筆尚可稱為「油站地價回撥」嘅錢吞埋落肚，先至真係可以幫到運輸行業，特別係客運行業解決呢場，用偉大的党嘅講法「由美帝紙老虎侵犯別國主權」引發嘅「石油危機2026」。
Be the first to comment