【港鐵】工程車勾爛路軌訊號箱？ 港島綫上繁服務一度受阻

2026年2月11號0639時，港鐵公布灣仔站附近有物件阻礙路軌，令港島綫服務受阻；其後港鐵指上環←→鰂魚涌需要全面暫停服務，港島綫列車只可以維持堅尼地城←→上環、鰂魚涌←→柴灣兩段嘅列車服務，每10分鐘一班。

港鐵喺暫停服務嘅港島綫車站發出緊急廣播，指發生嚴重事故，乘客必須立即離開，乘客出閘唔會被扣減車費，職員隨即落閘防止再有市民進入車站；警方亦一度派員到場維持秩序。

由於正值朝早返工返學嘅繁忙時間，港島北一帶聚集唔少市民改搭其他公共交通工具，暫停服務嘅港島綫車站外見到市民紛紛改搭地面公共交通工具。

期間有唔少市民改搭電車，電車站人龍一度排到出行車路，電車車廂逼滿乘客，唔少乘客需要喺上層站立。

港鐵最終喺0730時公布已經清理好路軌，港島綫列車回復正常服務。

據悉呢次事故係因為夜間維修工程，工程列車有物件脫落，勾爛咗設置喺路軌中間嘅訊號箱。有消息流傳指，事發時相關工程人員未能及時察覺，直到0607時由柴灣開出嘅列車喺去到灣仔埋站嗰陣，先至由列車車長發現有障礙物，所以港鐵去到0639時先至公布事故。