路軌走綫及斜度調整 2026年屯馬綫乘客有2日要喺紅磡站落車過對面月台轉車

港鐵公司2025年12月17號宣佈，由於屯馬綫紅磡站至尖東站之間要進行路軌改道嘅跟進工序，部份路段需要短暫封閉，屯馬綫需要喺2026年2月1號同埋2026年3月8號實施特別服務安排。

呢2個指定星期日嘅行車時間內，屯馬綫會繼續維持全綫列車服務，大部分乘客車程如常，只有車程途經紅磡站嘅乘客需要喺紅磡站落車，行去對面月台轉車繼續行程。港鐵會透過唔同渠道提醒乘客相關安排，亦會加派職員喺現場指示以及協助乘客。

屯馬綫自從2021年全綫通車，大大方便市民出街。連接紅磡站新屯馬綫月台路段嘅主要路軌改道工序喺通車前已經完成，而淨低嘅跟進工序，港鐵按計劃安排喺通車後分階段進行。隨着跟進工序進入最後階段，介乎紅磡站同埋尖東站之間路段，需要調整路軌走綫同埋斜度、信號系統以及架空電纜設施，加上翌日行車前進行檢查。港鐵話呢啲工序完成後，列車行駛嗰個路段嗰陣會更加暢順，乘客可以享受更舒適嘅搭車體驗。

港鐵表示工序涉及複雜步驟，將佢分割成每晚收車後嘅「黃金兩小時」進行係行唔通。港鐵就決定喺2026年橫跨2月1號、2號同埋橫跨3月8號、9號嘅凌晨時份，先後於喺紅磡站附近往烏溪沙方向以及往屯門方向嘅路軌進行工程。港鐵聲稱工程團隊已經做好詳細規劃，致力順利完成有關工序，令2026年2月2號以及3月9號自頭班車開始回復正常服務。

港鐵話為咗配合工程，2026年2月1號以及3月8號，屯馬綫會維持全綫列車服務，並且維持星期日嘅正常班次，各車站都可以搭車。屆時，大部分乘客車程如常，只有車程途經紅磡站嘅乘客，需要留意自頭班車起實施以下調動：

• 由烏溪沙站開出嘅列車，會以紅磡站為終點站，之後返回烏溪沙站
• 由屯門站開出嘅列車，同樣會以紅磡站為終點站，之後返回屯門站
• 若屯馬綫乘客嘅車程會途經紅磡站，必須喺紅磡站落車行去對面月台轉車繼續行程

港鐵會額外調派超過150名職員指引以及協助乘客，包括喺紅磡站屯馬綫月台舉起大型指示牌，以便乘客辨別列車前往嘅方向，職員亦會在場維持秩序、協助有需要嘅乘客，尤其係使用輪椅嘅乘客、孕婦、長者等。屯馬綫沿綫車站同車廂廣播亦會提醒乘客相關轉車安排。

港鐵公司「營運主管－屯馬綫，輕鐵及港鐵巴士」陳志雄先生表示，呢次港鐵安排喺2個星期日進行相關工序，並且維持屯馬綫全綫列車服務，盡量減低對乘客嘅影響，感謝乘客嘅理解同埋包容。若果因為未能預期嘅突發情況，工程未能按原定計劃完成而影響翌日屯馬綫嘅列車服務，港鐵會盡快作出公佈同埋通知乘客，並且作出相應車務安排。

港鐵將會透過唔同渠道，包括車站海報同告示、車站、車廂廣播、MTR Mobile、港鐵網頁、傳媒及社交媒體等持續發放資訊，提醒乘客注意嗰日嘅服務安排，並且呼籲乘客為行程預留充裕時間，出門前可使用 MTR Mobile 或港鐵網頁「行程指南」功能計劃行程。

當然可以揀改搭巴士。