以色列耶路撒冷嘅莫舍（Moshe）同埋米里亞姆（Miriam）某一晚喺耶路撒冷搭「Extra」公司嘅67號路線巴士嗰陣偶然相遇，而喺2025年12月佢哋就有幸以新郎、新娘身分乘搭返呢架見證佢哋愛情嘅巴士順利完婚，由婚禮現場接咗佢哋返屋企。
故事始於某一晚嘅耶路撒冷中央巴士站。米里亞姆同朋友一齊上咗一班「Extra」公司嘅67號路線巴士，坐喺米里亞姆身後嘅莫舍問米里亞姆借手提電話充電器——當時米里亞姆身上無帶住充電器，但米里亞姆回答莫舍：「如果我有帶嘅話，你會係我第一個就肯借畀嘅人」
米里亞姆呢一句足以令莫舍印象深刻。米里亞姆落車之後，莫舍鼓起勇氣問米里亞姆嘅朋友要咗米里亞姆嘅電話號碼，幾句鐘後發咗一條短信畀米里亞姆…一切就係咁樣展開，最終成就咗一段美好愛情。
2025年12月，呢段緣分進入新一章：莫舍同埋米里亞姆正式完婚。米里亞姆就決定聯絡「Extra」公司畀個驚喜佢老公莫舍，「Extra」公司得知喜訊亦樂意配合。「Extra」公司嘅營運管理暨顧客關係經理Maayan Shemesh得知呢架巴士對佢哋幾咁重要之後，就直接安排咗一架經過一番裝飾嘅「Extra」公司巴士，成為咗呢對新人嘅婚禮花車，為呢對新人可以喺佢哋愛情故事嘅起點——67號路線巴士上影相留念，兼且搭佢返屋企。
當然，話明係驚喜，米里亞姆就梗係事前唔畀莫舍知道有咁嘅安排，米里亞姆話當婚禮臨近尾聲嗰陣，佢拉住老公行出去就見到嗰架經過裝飾嘅巴士，「我老公可以話係震驚」，當時一眾親友在場見證同埋影相留念，「氣氛令人感動」。
米里亞姆仲話巴士司機好好人，提議可以揸架巴士喺市區兜個圈，然後再載佢哋返屋企，「婚禮有一架完全屬於我哋嘅巴士…係我一個獨一無二嘅經歷。」
「Extra」公司Atarot分部經理Ihab Zaatari就話，呢件事喺公司員工之間都好有共鳴，「我哋每日接載以萬計嘅乘客，其實都好難得知道一程巴士可以建構人生」。
米里亞姆總結成件事就話，人真係唔會知道緣份幾時嚟到，「不過我就喺67號路線巴士遇到，仲要好好彩修成正果。」
大家下次搭巴士記得問下其他乘客有無得借充電器喇！
Be the first to comment