【英國】博彩公司巴士廣告「贈慶」英超球隊曼聯持續敗陣

英國職業足球比賽除咗同巴士有關之外，更為人熟識嘅關係莫過於博彩公司。綜合英國傳媒報導，有一間博彩公司日前於曼徹斯特 Bee Network 嘅雙層巴士裱上廣告。驟眼看未必為意係博彩公司的宣傳，但原來個廣告係向近一年比賽表現持續低迷嘅曼聯「贈慶」，而且仲安排部巴士駛往奧脫福球場 (Old Trafford Stadium)拍攝硬照並在網上發佈，擺明「攞彩攞到盡」。

一部大曼徹斯特區 Bee Network 嘅雙層巴士，裱上咗一個車身廣告，版面設計簡單，主要用字是 THE ONLY 343 THAT WORKS IN MANCHESTER 在上層旁板，另在下層旁板有著有如信件下款 PADDYPOWER 字樣，巴士有載客並駛至英超「勁旅」曼聯嘅主球場，有多幀照片在 “X” (即 Twitter) 流出。

翻查 Bee Network 嘅路線資料，確有編號 343 嘅路線，行駛海德 (Hyde) 與奧咸 (Oldham) 之間，途經斯塔利橋 (Stalybridge) 、莫雷斯 (Mossley)，為一條類近九巴53號嘅郊區流水線。從以下 Google 地圖畫面截圖睇到，行駛路線與奧脫福球場完全風馬牛不相及。

PADDYPOWER 原來係英國一間博彩公司，但除非有睇開英格蘭超級足球聯賽，未必為意係乜嘢一回事，只不過如果係唔少香港球迷 (例如歌手李克勤) 追捧嘅曼聯嘅 FANS 的話，就會好清楚知道呢個廣告嘅含意所在，就是擺明車馬向曼聯，尤其是現任主教練艾摩廉 (Rúben Amorim)「抽水」。

至於架巴士點解駛經奧脫福球場，報導聲稱為 PADDYPOWER 安排開出嘅「特別班次」，仲特登搵攝影師影沙龍，簡直係「抽水抽到爆」。

呢個廣告嘅背景該是針對於去年11月上任曼聯主教練，來自葡萄牙嘅艾摩廉。事關佢執教以來，曼聯嘅表現一厥不振，上季終結排名15，是1973/74年度降班以來嘅最低嘅排名；到今季開賽至今四場比賽僅1勝1和得4分，是1992/93年度以來得分最少嘅一個季度。英國當地嘅球迷同一眾球評家均批評佢未有理會球員嘅技術特質，堅持採用 3-4-3 陣式，是招致連場敗仗嘅主因。但佢近日接受各傳媒訪問時，明言唔會改變堅持3-4-3陣式嘅諗法。湊巧地大曼徹斯特區有343號巴士線，PADDYPOWER 可能因此藉機宣傳一下。

唔知一眾曼聯球迷，probably 尤其是李克勤，睇到呢部巴士，唔知有乜感受呢？又或者曼聯之對家曼城嘅Fans，又唔駛太過開心，雖然上週對戰曼聯大勝3:0，但4戰2勝2敗暫得4分，暫時排第8。