【電車】姜濤26歲生日 後援會停車巡遊暨免費電車乘車日

姜濤香港後援會 KeungShow HKFanClub（後援會）連續第4年共襄善舉，搵嚟 Hong Kong Tramways 香港電車 合作，喺2025年4月30號姜濤 生日當日舉辦「電車免費乘車日」，連同全香港市民一齊祝賀姜濤26歲生日。

後援會透過香港電車向社區傳遞《Keung To Adventures in Bloom》嘅春日活力以及暖意，而姜濤生日主題廣告電車「姜叮」陣容亦再度升級，4款截然不同造型嘅廣告電車已經喺2025年4月初率先面世，為「電車免費乘車日」造勢。當中姜濤更榮登巨型廣告電車（#300）嘅「第一人」，令生日應援活動更上一層樓！

4架「姜濤號」自2025年4月初穿梭港島北岸核心鬧市，為第4年電車應援活動展開序幕。每架電車都採用獨家設計車身廣告，日夜展現一種姜濤支持者（姜糖）嘅創意以及祝福，而後援會仲係除咗香港電車自己公司以外首個動用巨型廣告電車（#300）嘅團體 ，將「姜糖」對偶像嘅關愛以及慶生歡樂氣氛推向高峰！

2025年4月30號「免費乘車日+電車巡遊雙重驚喜」

・電車免費乘車日：市民當日可以無限次免費乘搭全線普通載客電車，屆時歡迎乘客喺銅鑼灣嘅「姜濤灣」、黃金廣場、金百利商場、皇室堡 Windsor House、銅鑼灣地帶 Causeway Place、東角 LAFORET等地點打卡或參與慶生活動。

・電車巡遊：2025年4月30號1130時左右，後援會延續慶生傳統，「姜濤號」會接載預先登記咗嘅「姜糖」由屈地街電車廠出發，前往銅鑼灣「姜濤灣」 ，之後隨即折返屈地街電車廠 ！

電車巡遊出發之前，後援會安排咗嘅大約30名可以登上派對電車參與活動嘅「姜糖」首先齊集喺屈地街電車廠，同特別為姜濤慶祝生日嘅佈景板以及「小姜姜」一齊合照「打卡」。

當參加巡遊嘅3架電車喺屈地街電車廠慢慢現身，「姜糖」都好雀躍，繽紛攞起手提電話影低呢個重要時刻。

後援會安排咗嘅大約30名可以登上派對電車參與活動嘅「姜糖」，除咗可以喺電車廠入面優先「打卡」之外，後援會仲準備咗一啲紀念品畀佢哋拎走。

時間去到1135時，參與巡遊嘅3架電車慢慢由屈地街電車廠出發，沿電車路向東行前往銅鑼灣。

大約一個鐘頭之後，3架巡遊電車就去到銅鑼灣，呢個出名嘅「姜濤灣」一早就逼滿咗「姜糖」夾道歡迎，佢哋企滿晒喺崇光百貨門前嘅過路處行人路，警方疲於奔命咁維持秩序。

一眾「姜糖」整日都喺銅鑼灣一帶派發應援物品，引致附近街道堆滿人，場面一度非常混亂，多名便衣警員需要四出制止嚴重阻礙公共道路嘅派發活動。

就算入夜之後，大批「姜糖」依然將銅鑼灣多條街道逼到水洩不通，便衣警員需要徵用附近商場多條圍欄帶協助分隔出多個區域，留低一啲行人通道畀其他人路過使用。