【渡輪】「Jetfoil噴射船」服務港澳半世紀

1975年4月25號，「噴射飛航」前身——信德船務旗下嘅遠東水翼船公司——首次採用由美國波音公司出産嘅929型「Jetfoil噴射船」「木星」號載客由香港前往澳門，憑當年革命性嘅船體離水航行設計帶來前所未有嘅穩定航行、航線中首度採用噴射引擎刷新速度紀錄，以及相對之前款式水翼船倍增嘅載客量，為「香港←→澳門」航線揭開全新一頁，開啓同款船隻連接港澳兩地至今半世紀嘅歷程。

時至今日，「Jetfoil噴射船」係香港以及澳門現存最古老嘅高速海上集體運輸交通工具，雖然有人認為佢哋已經風光不再，但係「Jetfoil噴射船」仍然繼續接載市民以至全球旅客猶如飛行咁往來港澳兩地。

「木星」號1975年初抵達香港，1975年4月10號試航後，喺1975年4月25號上晝9點首次載客由香港前往澳門，當日來回港澳3次。

「木星」號1974年10月竣工時造價350萬美元（以當年匯率換算就係近1 800萬港元），而根據1972年夏季嘅價單，同樣由波音出産嘅737-200系列客機，最平嘅版本都只係520萬美元，可見當年遠東水翼船公司係幾咁進取。

「木星」號投入服務後，來往港澳嘅海上航程單程由原有水翼船所需大約75分鐘縮減到約50分鐘，載客量較原有水翼船增加一倍到大約280人。當時「Jetfoil噴射船」收費為平日30港元，週末假期35港元，另加「人頭稅」5港元。遠東水翼船公司喺「木星」號行駛首100小時後表示，「木星」號未曾出現機械故障，首126班船期中只有4班受外來污染物影響而取消或延期——呢艘對港澳航線以至全世界高速客運渡輪歷史極具意義嘅「木星」由1975年一直服務到2013年11月底因為撞到海上不明物體後退出服務行列，船隻至今一直存放喺船廠入面。

雖然「香港←→澳門」海上航線早喺1964年已經首度引入Supramar PT20型（68座）以及後嚟嘅Supramar PT50型（125座）高速水翼船，但最初使用嘅呢一啲水翼船只係半浸式水翼船，航行嗰陣弧形水翼露出水面，容易易受風浪影響導致乘客「暈浪」。由飛機生產商波音公司開發、出産嘅「Jetfoil噴射船」就係劃時代嘅「全浸式水翼船」，船頭、船尾各設有可收納嘅「水翼」，巡航時即使船身有如飛機一樣完全離開水面，但「水翼」一直保持喺水底，因而相對唔受海面干擾，有效抵抗高達3.5米大浪，加上利用當時屬最尖端嘅電腦恆常控制航行姿態，航行期間穩定舒適。

「Jetfoil噴射船」由後「水翼」底部吸入海水，經一對噴射引擎推動每秒排出3噸海水，令巡航速度可以達到43節（即係大約時速80公里），加上相比原有水翼船大幅擴大嘅空間，以全世界嘅船隻科技發展上嚟講具劃時代意義。

自從「木星」號以及1975年稍後抵達香港「金星」號成功拓展「香港←→澳門」海上航線後，遠東水翼船公司就由全世界採購同款「Jetfoil噴射船」，仲喺1980年2月加入夜視系統提供夜航服務，令旅客即日來回港澳更輕鬆。

根據可考資料，由當初波音出産「Jetfoil噴射船」，連同授權畀日本、印尼生産，以至中国引進波音技術生産嘅「Jetfoil噴射船」，至今總數合共46艘，而喺1990年代高峰期，一共有16艘「Jetfoil噴射船」行走「香港←→澳門」海上航線，信德船務就係全世界擁有最多「Jetfoil噴射船」嘅船務公司。

隨着2020年年初起，新型冠狀病毒（武漢肺炎）疫情爆發導致「香港←→澳門」海上航線中斷歷時3年，期間多艘「Jetfoil噴射船」退役並且被拆毀。1974年3月竣工嘅全球第1艘「Jetfoil噴射船」「水星」號（比1975年首航「香港←→澳門」海上航線號「木星」號早大約7個月竣工）喺期間一度被送去曾經拆解多艘船隻嘅香港宏德機器鐵工廠，幾經香港以及澳門社會各界據理力爭，「水星」號未被拆毀，現時同「木星」號等退役船隻一齊存放喺船廠。

2024年9月20號，噴射飛航喺疫情告一段落後首次重新使用「Jetfoil噴射船」「錫星」號載客，現時「錫星」號每日來往香港以及澳門2次，坊間相信隨着客量恢復就有機會見到更多「Jetfoil噴射船」恢復服務公眾。

「香港←→澳門」海上航線之外，「Jetfoil噴射船」亦曾喺歐美等地服務乘客，現時「Jetfoil噴射船」仍然活躍喺日本多條國內航線，為日本多個外島提供高速可靠嘅渡輪服務連接附近都市，包括：

• 東京←→伊豆諸島
• 新潟←→佐渡島
• 境港←→隱岐諸島
• 福岡←→壹岐島及對馬島
• 長崎←→五島列島
• 鹿兒島及指宿←→屋久島及種子島
• 那霸←→久米島航線

1987年，美國波音公司授權日本川崎重工喺日本當地生產「Jetfoil噴射船」，產期持續至1995年。相隔25年後，日本川崎重工重新投產「Jetfoil噴射船」——「七島結」號喺2020年竣工，建造費為50億日圓（以當年匯率換算就係大約3億5000萬港元），即使未來建造費用相信會進一步上升，但日本仍然打算更新「Jetfoil噴射船」船隊，可見「Jetfoil噴射船」至今仍然有無可取代嘅優勝之處。

（協力：Jetfoil噴射船保育關注組）