九巴全新「安達臣專線」新路線2025年3月底啟航

九龍巴士（一九三三）有限公司（「九巴」）自2016年開始服務安達臣道發展區，為安達、安泰居民提供優質巴士服務，去到2024年獲選營辦安達臣道石礦場發展區4條新路線嘅巴士公司。為迎接安愉道首個居屋項目——安秀苑——入伙，九巴宣布2條全新「安達臣專線」——19號巴士路線以及600號巴士路線分別喺2025年3月30號以及31號投入服務，配合區內轉乘優惠，進一步提升九巴東九龍巴士網絡。

19號巴士路線全日接駁彩虹鑽石山

由2025年3月30號開始，九巴19號巴士路線全日接駁安達臣以及鑽石山，途經安秀苑、安泰巴士總站、白虹樓、牛池灣轉車站-彩虹站及紅萼樓、鑽石山啟翔苑。居民乘坐19號巴士路線可以喺「牛池灣轉車站」轉搭超過50條九巴路線往返九龍巿區、沙田、大埔、北區、元朗以及屯門等地方，第2程車最高更可享港幣$4.20轉乘優惠。

路線	每日服務時間	途經地點	全程車費
19 安達臣（安愉道）——鑽石山 （循環線）	0530~0030	安峯 安秀苑 安泰 牛池灣轉車站 鑽石山	$5.20

600號巴士路線遠達銅鑼灣中環

由2025年3月31號開始，全新東隧過海快線——九巴600號巴士路線啟航，早晚繁忙時間提供服務，途經安秀苑、安泰（錦泰樓）、安達、寶達轉車站、藍田站、東隧轉車站、北角、銅鑼灣、灣仔、金鐘以及中環。600號巴士路線為安達臣發展區以及寶達提供最快捷嘅路線經東隧前往港島北岸，九巴指視乎路面情況，寶達前往北角可以快到只需要大約15分鐘。

乘搭600號路線可以喺寶達轉車站以及東隧轉車站落車，享用優惠轉搭各條九巴路線往返九龍巿區、將軍澳等地方。此外，乘客亦可以喺東隧轉車站，免費轉搭613或者613A號巴士路線前往港島東，或者享用優惠轉搭603或603S號巴士路線跳過北角以較直接嘅方式前往灣仔以及中環，九巴相信開辦新路線之後繁忙時間前往中環更快捷。

路線	服務時間	途經地點	全程車費
600 安達臣（安愉道）←→中環（林士街）	星期一至五 （公眾假期除外） 往中環： 0700~0800 往安達臣： 1730~1900	安峯 安秀苑 安泰 安達 寶達轉車站 東隧轉車站 北角 銅鑼灣 金鐘 中環	$12.60

聯同專線小巴、香港電車推出轉乘優惠

九巴會聯同專線小巴以及香港電車提供轉乘優惠，乘客由九龍出發，以八達通繳付車資乘搭600號巴士路線前往港島，再轉搭指定專線小巴路線，或者乘搭指定專線小巴路線，並且喺港島轉搭600號巴士路線前往九龍，成人以及持有「學生身份」個人八達通嘅乘客，第2程可享 $1 車資優惠；互相轉乘香港電車嘅話，按照成人或小童收費就可以扣減等同一程香港電車車資，從而令到轉乘網絡覆蓋到跑馬地、西環等。

九巴期望轉乘優惠可以為安達臣以及東九龍一帶居民提供更優惠巴士服務，以及享有更多出街搭車嘅選擇。

全線電巴服務 體驗零碳出行

九巴表示以上2條「安達臣專線」投入服務之後，將主力以雙層電動巴士行走，為安達臣一帶乘客提供零路面排放、舒適嘅巴士服務，方便居民通勤之餘，亦能感受路邊零碳出行嘅體驗，為構建安達臣成為環保社區出一分力。

當問到九巴喺多區開拓新路線嘅時候都聲稱優先使用電動巴士服務居民，但係現時九巴嘅電動巴士數目有限，九巴傳訊及公共事務部主管簡學悕回應指九巴會睇住乘客嘅需求，優先以乘客需求作為考量，必要時調派返柴油巴士服務乘客，但同時九巴為咗配合運輸發展，喺更新車隊嘅時候會擴充電動巴士車隊規模。

爭取靈活調動資源 延長服務範圍、活化路線

九巴表示會密切留意「安達臣專線」客量需求以及安達臣道石礦場發展區各屋苑入伙進度，適時提升服務，九巴副車務總監（東部）黃裕廷指出九巴必要時會物色一啲附近嘅路線，向當局申請延長路線——九巴留意到喺油塘同秀茂坪之間一帶，居民（尤其係學生以及主婦、老人）喺區內「山過山」嘅需求迅速增長，九巴會研究延長部分區內現有路線，從而透過靈活調動車隊資源，務求利用呢一啲嘅乘客需求活化巴士路線。

同一時間，九巴亦正籌備開辦直達路線，由安達臣道石礦場發展區分別前往深水埗以及尖沙咀，運輸署落實後會適時公布有關詳情。