「小巴大王」馬亞木離世，終年九十有六

名下公司持有逾600部小巴，坊間外號「小巴大王」嘅馬亞木日前於浸會醫院病逝，終年96歲。

由創辦「冠榮車行」開始，馬亞木家族累積持有逾600部小巴，以其名下公司持牌經營約80條綠色專線小巴路線，與及唔少「合夥」經營路線，例如「持牌」為金匙的九龍區26號專線小巴，並有少量紅VAN 出租，亦曾染指的士。另外，全資擁有陳添旅遊巴及透過陳添持有雅高巴士。

講到小巴，相信市民都必然想到近期熱門話題之「小巴 Call Loan」，馬氏家族呢逾600部小巴是否有牽涉其中當然無法確定，不過就如傳媒報導近年馬氏持續放售物業而成交價都低水甚至蝕讓，不排除係蛛絲馬跡。假設全部車均有向銀行借貸，估計債務總額達10-12億港元，甚至超過20億嘅可能性係存在。

馬氏生前最常提到「小巴係蝕本生意」，其名下公司直接經營嘅80條專線當中，的確有唔少係「蝕到仆街」，例如「上水粉嶺鄉村車系列」；但亦有唔少「賺到盤滿缽滿」嘅，例如有被稱為「慈雲山升降機」嘅37M、「飛鵝山升降機」嘅16，更當然唔少得「新界環迴公路飛車黨」的44系。

再又有唔少表面上係雞肋實際都「有水位」，例如屯門鄉下買餸線的43系。據聞馬氏原以為呢組線只係「開善堂」於是迤住做，點知N年前時任當區區議員「B豬」死咬唔放脫班、收車問題，迫到馬氏焗住要加人加車，甚至加時將尾車由2130延至2300，點知原來有錢賺喎。到底小巴真的如馬亞木生前所言，還是其家族經營嘅問題，留給看倌們自行判斷吧。但又如將軍澳113線事件，以至小巴業內流傳「馬家有人朝中好辦事」的江湖傳聞，可能反映馬氏嘅經營之道非一般凡夫俗子所理解的。

論到馬氏經營小巴之奇技，當然少不得買咗返嚟擺多過行嘅 OPTARE SOLO M790。據聞馬亞木本身並非一如「19CEO」的反對引入低地台小巴，只係認為車價之高應該由政府提供補貼或宏觀的調整小巴政策提供足夠誘因。奈何日常事務均由與「19CEO」關係緊密嘅「二代生」打理，可會因此而最終連同維修開支「燒」掉逾二百萬真係天知地知了。

若要蓋棺論成敗，單憑錢財數字去衡量，馬亞木確實成功，但若聚焦於近年的「跌市」，可能另有睇法。不過可以肯定馬亞木確實係一個傳奇；而據曾經同佢多番見面接觸嘅 Uncle Lim 則指，「木叔」點計都係一個值得尊重嘅長輩嚟嘅。據馬家訃告，將於下週六3月30日(農曆二月廿一)於世界殯儀館設露舉殯。