「萬寧貓」搭開篷巴士去派福袋 祝大家「福氣一條龍」！

萬寧係香港牛奶公司集團成員，喺香港屬於具規模嘅連鎖個人護理產品零售商，分店遍佈港九新界，主要銷售護理、保建、日常用品、藥品、化妝品以至零食等。

為咗推廣萬寧呢個嘜頭，早喺2011年尾，萬寧就搵咗一隻貓拍攝廣告，當年呢隻貓千辛萬苦去搵「天山雪蓮」拯救「貓奴」，臨尾發現原來買藥可以簡單走去萬寧…廣告嘅故事感動咗唔少觀眾，更成就咗「萬寧貓」呢一個企業吉祥物。12年匆匆過去，「萬寧貓」呢隻吉祥物就算有經歷體型以及性格嘅微妙轉變，但依然係香港人心目中一個簡單易明嘅象徵。

每逢臨近農曆新年，萬寧都會有一啲推廣活動，「萬寧貓」呢隻吉祥物當然就有份㗎啦！香港大型專營巴士嘅車身廣告點少得「萬寧貓」…

但除咗呢一啲廣告之外，「萬寧貓」仲會走入社區同公眾見面——為咗迎接2024年甲辰龍年，萬寧就搵嚟公關公司L Concept Communications安排咗一個掛名叫「福氣一條龍特派車」嘅活動…

咦？睇見啲宣傳品，「萬寧貓」會乘搭嘅「福氣一條龍特派車」係Enviro500型開篷巴士嚟嘅？！腦入面即刻萌生咗一個咁樣嘅畫面：

但相信熟悉巴士嘅應該都會諗起，香港使用Enviro500型開篷巴士嘅肯定都係嗰間巴士公司㗎啦！只不過…嗰間巴士公司得5架開篷巴士，嗰5架開篷巴士又要分返開有3架係專營巴士，法理上得2架非專營巴士可以出租，而喺要為「福氣一條龍特派車」裱上廣告嗰陣，嗰2架非專營巴士就1架「做緊大驗」、1架「未翻得切油」，結果…

「萬寧貓」呢一架「福氣一條龍特派車」就唯有臨急臨忙轉用新輝旅遊旗下嘅猛獅A95 ND323F型12米版本開篷巴士。（嗱，猛獅配「萬寧貓」，成個貓家族咁出動呀！）

「萬寧貓」連同「福氣一條龍特派車」喺2024年1月26號首次出動，率先就去到鰂魚涌英皇道981號嘅萬寧Plus分店，以及將軍澳貿業路順德聯誼總會梁潔華小學對面，為當區居民送上「萬家常滿祝 福氣一條龍」，仲每個地方派咗過千個內有健康美容產品嘅「萬寧貓福袋」㖭！

去到2024年1月27號，「萬寧貓」加埋「福氣一條龍特派車」嘅第1站就係旺角上海街朗豪坊對出，為咗好好咁安排將福氣帶畀當區居民，「福氣一條龍特派車」同埋一眾工作人員早喺朝早9點幾就已經到場準備。

又話說「福氣一條龍特派車」轉用新輝旅遊旗下嘅猛獅A95 ND323F型12米版本開篷巴士，「萬寧貓」呢個廣告裱咗上去之後就有個得意嘅地方：

原來只要唔貼個肚腩位出嚟就唔會畀人知道有個肥肚腩㗎喇！

笑就講完，言歸正傳，「福氣一條龍特派車」喺旺角呢一站同樣會派出過千個「萬寧貓福袋」，吸引咗唔少「萬寧貓」嘅支持者到場排好隊咁攞！

只不過，話晒旺角呢個地方人流複雜，據講就有人向警方投訴「有人群聚集堵塞路面」，搞到旺角警署派咗兩車警員趕嚟睇下發生乜事…

「萬寧貓」：
我呢班支持者好乖好守秩序㗎！
警察叔叔你哋唔需要咁緊張呀！

（設計對白）

「萬寧貓」知道有咁多支持者嚟到旺角朗豪坊探佢，當然就要露面畀大家「打卡」啦！

唔好屈「萬寧貓」係「大懶貓」呀！

每節15分鐘嘅露面時段，「萬寧貓」都動作多多，又揮手又搲頭又舐手仔又抹面，見到熱情觀眾仲會大送「飛吻」㖭！引到一班啱啱返完課外活動嘅學生都跟著有樣學樣扮「萬寧貓」嘅動作，場面幾咁歡樂和諧。

開心時間過得特別快，「萬寧貓」同埋「福氣一條龍特派車」喺下晝2點鐘就開始由旺角朗豪坊轉移陣地去尖沙咀東部…

大家不如試想像一下，就當「萬寧貓」係好似參加選舉嘅候選人咁，企喺開篷巴士車頭揸住咪同大家嗌「支持萬寧貓」，相信都好難拒絕喎！

呢一次「萬寧貓」搭「福氣一條龍特派車」由旺角轉移陣地去尖沙咀東部，途經上海街、咸美頓街、彌敦道…沿路「萬寧貓」都不停咁向途經嘅路人揮手，喺交通燈前面塞緊車嗰陣，「萬寧貓」係唔會錯過喺隔離嗰條行車線一齊等緊嘅巴士乘客㗎！

作為一隻敬業嘅企業吉祥物，就算「福氣一條龍特派車」係行咗入去兩邊只係幅牆嘅行車下通道，「萬寧貓」依然保持向週圍揮手，相信佢有得搭巴士週圍去街街，應該都好開心！

「福氣一條龍特派車」喺下晝3點鐘左右就終於喺尖沙咀東部梳士巴利道九龍香格里拉酒店對開搵到位置可以停低，稍作整頓之後又開始下一輪嘅活動。

就算星光大道側邊無民居，但係一大班「萬寧貓」嘅支持者一早已經到場等候，佢哋唔少人接過福袋之後都笑逐顏開。

「萬寧貓」見到場面咁開心，當然又要出下嚟拋頭露面，畀一眾支持者打卡留念啦！

「萬寧貓」昅實工作人員喺尖沙咀東部派咗兩個鐘頭福袋之後，連埋之前喺旺角辛苦咗咁耐，5點幾鐘就已經攰到要匿埋喺「福氣一條龍特派車」呢架巴士下層入面唞唞。去到黃昏6點鐘左右，「福氣一條龍特派車」呢架巴士完成咗呢一日嘅旅程，司機叔叔揸走架巴士返去喇！

如果大家錯過咗呢兩日「萬寧貓」連同「福氣一條龍特派車」嘅出巡派福袋活動——冷靜啲——喺2024年2月3號以及2月4號，「萬寧貓」連同「福氣一條龍特派車」係會再去到另外4個地點派發「萬寧貓福袋」…大家到時又可以去偶遇「萬寧貓」㗎喇！

不過唔知道「萬寧貓」會唔會咁樣諗呢？🤔

（本次活動過程中，沒有任何動物受到傷害）