闊別三載「港鐵展廊」重開何以需再來？

設喺港鐵九龍站嘅「港鐵展廊」喺2023年12月9號再度開放畀公眾人士預約參觀。為慶祝「港鐵展廊」再度開放，港鐵公司特別精心設計咗一幅超過3米高、近7米闊嘅巨型「『鐵仔』香港發現之旅」主題牆，分享鐵仔喺香港著名景點漫遊嘅趣聞軼事。同時，經過翻新嘅「港鐵展廊」亦注入更多新元素，包括全新展品、互動多媒體遊戲、多個打卡熱點，為參觀者帶嚟嶄新體驗。公眾人士由2023年11月29號朝早10時開始可以透過港鐵公司網頁嘅預約系統登記，免費入場參觀。

「港鐵展廊」因為「新型冠狀病毒」疫情而自2020年起休館，期間港鐵翻新咗佢，令展廊由入口到入面都新增多個富有港鐵元素嘅景點，其中為慶祝展廊再度開放而喺入口特別新增「『鐵仔』香港發現之旅」主題牆，由「鐵仔」帶領大家穿梭香港，遊歷同埋探索本地美食、風景名勝以及藝術文化，仲融入唔少港鐵經典元素，展現港鐵同香港密不可分嘅關係，再配合入口經典嘅「港鐵車票萬花筒」——以超過8000張車票砌成嘅「港鐵車票牆」，無疑係公眾參觀展廊必到嘅打卡點。

除咗保留場內1：1嘅模擬列車車卡同埋多架列車模型之外，其他全新元素仲包括介紹港鐵車票演變進程嘅「車票回憶門廊」、集合99個港鐵車站經典顏色嘅「打卡牆」、測試參觀者對港鐵路綫以及車站認識嘅「多媒體互動遊戲」、工程車模型等，為參觀者帶嚟更多互動歡樂觀賞體驗。

港鐵公司企業事務及品牌總監蔡少綿小姐表示：

「港鐵展廊」展示咗鐵路同社區嘅緊密聯繫，特別係同乘客生活相關嘅唔同面貌。展廊喺2017年首次開放畀公眾人士參觀，一直以嚟都深受各界人士以及團體歡迎，3年內總共錄得超過55000參觀人次，反映市民對鐵路嘅濃厚興趣。翻新後嘅展廊將加入更多新展品，畀公眾一同探索港鐵更多發展面向。

「港鐵展廊」位於港鐵九龍站機場快綫1號月台（往機場及博覽館站方向），由2023年12月9號開始，逢星期六、日以及公眾假期開放畀公眾人士預約免費入場參觀，每日5場，每場參觀時間60分鐘、可容納最多60人：

1000時
1115時
1330時
1445時
1600時

為慶祝「港鐵展廊」重開，首2500名公眾人士都可獲贈1枚限量版列車襟章（隨機以「盲盒」方式派發），為參觀添上獨特回憶。

公眾人士可以由2023年11月29號朝早1000時起喺呢個網址預約30日內場次，先到先得，成功登記後將會收到電郵確認。

「鐵仔」香港發現之旅

位於展廊入口，超過3米高、近7米闊嘅全新「『鐵仔』香港發現之旅」主題打卡位，注入咗豐富嘅港鐵同埋香港元素，包括標誌性嘅港鐵列車、香港地標建築物以及本地美食，展示港鐵同社區嘅緊密聯繫。最驚喜之處莫過於隱藏喺其中嘅港鐵吉祥物「鐵仔」，令參觀過程增添趣味，成為必到「打卡」位。

港鐵車票萬花筒

位於展廊入口嘅車票回憶牆，以超過8000張、自1979年推出嘅車票所砌成，包括磁帶車票以及智能車票，車票主題超過600款，極具紀念價值，塑造出另一個必到「打卡」熱點。

車票回憶門廊

磁帶車票、智能車票以及數碼支付工具，代表港鐵車票隨著科技發展演變。精心設計嘅「紀念車票牆」，展示多款特色紀念車票同埋里程碑紀念車票嘅故事，分享當中嘅歷史緣由同埋設計靈感。呢啲對港鐵極具意義嘅車票，包括港鐵1979年通車紀念車票、2000年10月5號「上市」紀念票套裝，12生肖紀念車票同埋各種特色車票等，勾起大眾同鐵路之間難忘回憶。（細心留意一下無咗邊張近年通車鐵路綫嘅紀念車票…）

港鐵繽紛世界

港鐵站經典顏色嘅「紙皮石牆」已經成為香港本地以及海外遊客嘅「打卡」熱點。全新「港鐵站彩色『打卡』牆」由99個港鐵站嘅主題顏色砌合而成，配以特色「港鐵宋體」，呈現港鐵美學以及港鐵站配色同設計心思。公眾唔需要四處走訪就可一次過同99個港鐵站主題顏色「打卡」，同時欣賞箇中巧妙設計。

「港鐵路綫快狠準」互動遊戲區

全新互動鐵路迷必玩遊戲，測試參觀者對港鐵有幾認識，涵蓋各種關於港鐵站同埋路綫等題目。此外，細緻嘅港鐵站裝置，亦係「打卡」熱點之一。

鐵路工程車精英

展出嘅14款工程車模型係曾經喺市區綫服務嘅工程車，包括架空電綫維修列車、路軌探傷車、鋼軌輾磨車組以及運錢幣列車——事實上，工程車對維持港鐵列車日常運作扮演著重要角色，無疑係鐵路系統保養以及維修上不可或缺嘅成員。

港鐵 ‧ 藝術

港鐵自1998年起一直同香港本地以及國際藝術家合作，將引人注目同埋具啟發性嘅藝術作品融入港鐵車站設計同埋建築入面，為顧客帶嚟更舒適悅目嘅搭車環境。展廊入面有精選嘅其中4件港鐵站內藝術作品以微縮模型方式展出，同公眾一齊感受藝術嘅療癒力量。呢啲展品包括第一城站嘅《犬張子 – 鯉躍龍飛》、何文田站嘅《蛙托邦拱門》、紅磡站嘅《失而復得》、油塘站嘅《行人、閒人》。

港鐵列車模型

公眾可以一次過欣賞由第1代直至現役嘅唔同列車模型，包括第1代俗稱「白頭」嘅載客列車、機場快綫以及東涌綫列車，仲有第1代「電氣化」東鐵列車同埋高速鐵路列車「動感號」等，一同回顧香港列車發展。

1：1模擬列車

置身喺1：1嘅模擬列車車卡入面可以感受到由1979~1998年以及1998~2023年2個階段、唔同年代嘅車廂設計，包括車廂扶手吊環、第1代列車嘅長櫈、舊宣傳海報以至電視廣告，絕對係不容錯過嘅「打卡」位置。

「我是車長」限定駕駛體驗

公眾置身喺模擬列車車廂可以一嚐港鐵車長滋味，由港鐵大學站模擬駕駛去到火炭站，升級版遊戲採用咗全新遊戲界面，視覺上更貼近現實車長嘅模擬駕駛訓練裝置，為大家帶嚟真實感以及新鮮感，同時可以了解港鐵列車運作。（用滑鼠玩嘅可以了解列車運作？！）

《港鐵維修車之機械暢敍》藝術品

名為《港鐵維修車之機械暢敍》嘅藝術品由退役港鐵客運列車嘅零件組成，呈現L66機車嘅側視外觀。L66機車退役前專責路軌維修，體現港鐵「退役列車保．傳」計劃精神，賦予退役列車零件第二生命。

漫遊港鐵

展廊內播放多條港鐵短片畀公眾觀賞，包括新列車投入服務、「退役列車保‧傳計劃」、車站藝術，以及港鐵喺業務同埋可持續發展等領域嘅相關影片，按時更新，以增加大眾對港鐵認識，締造一個充滿視覺聽覺參觀體驗。

短評

今次「港鐵展廊」重開，可以睇到港鐵公司其實都想喺公關上更進一步拉近同市民嘅距離。

展覽嘅地方面積唔算好大，而入面嘅展品對於一啲資深嘅交通迷嚟講，應該都「不外如是」。但站喺港鐵公司角度嚟睇，相信佢哋嘅目標都係一啲每日會接觸到港鐵嘅乘客，希望佢哋可以多啲了解佢哋乘搭港鐵嘅背後故事。

如果你係帶住小朋友嘅家長，相信呢個地方都足夠畀佢哋消耗一下好奇心，起碼港鐵公司都好有誠意咁將原本擺喺九龍灣總部嘅一啲模型拎咗出嚟畀大家欣賞，相信唔少小朋友都會為之雀躍。

放低對特定交通工具選擇嘅成見，其實港鐵公司應該都係秉承咗馬時亨時代嗰種希望提高透明度嘅風格，究竟市民接唔接受呢一種方式、咁簡單就已經叫做滿足到佢哋嘅期望呢？相信呢樣嘢都需要社會重新思考一下所謂「心繫生活每一程」本質會係乜嘢。

最後感謝採訪當日用心作出詳盡介紹嘅港鐵職員，祝佢前程似錦。