服務香港22載 VOLVO Super Olympian 10.6米巴士今夜退役

全港最後一部配備潛望鏡嘅九巴－富豪超級奧林比安10.6米巴士，將於今晚正式退役。唔少巴士迷特意嚟到樂富影相留念。

富豪超級奧林比安巴士嘅英文名「Volvo Super Olympian」中嘅「Super」被巴士迷戲稱為「豬扒」，所以比12米型號短嘅10.6米款式亦被冠上「短豬」嘅稱號。不過筆者都係比較鍾意稱呼佢喺初登場時，巴士迷會刊物中俾佢嘅別稱－「Q版超豪」。

呢款巴士自2001年開始喺香港服役，係全球獨有嘅型號。喺高峰時期，全港一共有100部同型號巴士。由於車身長度只有10.6米，啱哂行經較狹窄多街坊彎嘅路線，例如：2D、5D、7B、10號等。

全車可以載109個乘客，其中上層可以載51人，下層可以載26人，仲有32個企位。為咗配合擺放喺中軸前嘅散熱風扇同埋風缸，巴士嘅下層中門後嘅座位被改成橫排，係九巴最後一款配備橫排座椅嘅雙層巴士車款。而隨住新款式嘅巴士改用閉路電視取代潛望鏡供車長觀察上層情況，呢部富豪超級奧林比安10.6米巴士亦成為全港最後一架有潛望鏡嘅巴士。

九巴指仍然有兩部同款巴士，會透過「舊巴士及退役巴士捐贈計劃」捐贈俾學校做正向教育同埋STEM教學。而車牌LV8402 嘅富豪超級奧林比安10.6米巴士，今晚將會以11D路線作為終極之旅，由樂富開往觀塘碼頭。今晚退役後巴士將會被九巴保留，留待將來再作其他用途。