2022年12月17 ~ 18號，柴灣青年廣場舉行咗「YS學園祭」之中嘅「萌•動同人展 Doujin Fan Fest」，一連2日嘅「同人文化市集」一班香港嘅創作人展示同出售唔同嘅同人産品。
其中最吸引到筆者嘅應該算係「京阿尼在港應援組」…又…咁講啦…其實開頭都唔係咁留意到佢哋有乜特別，始終睇住檔口嗰位後生仔斯斯文文，又無開聲嗌「埋嚟睇埋嚟揀」，但係筆者見到佢一直好努力埋頭摺紙，於是埋去八卦吓…
Posted by 京阿尼在港應援組 on Friday, 16 December 2022
結果發現唔睇猶自可，一睇興趣就嚟喇！
原來「京阿尼在港應援組」參加呢次市集係義賣「痛巴士」紙模型，期間全部收益，都會用喺支持代寄香港人心意卡到「京阿尼」（京アニ，即係「京都動畫」，日語：京都アニメーション，英語：Kyoto Animation）嘅活動。
據「京阿尼在港應援組」所講，應援組承蒙「JR x SG Paper Bus Studio」提供摺紙巴士模型圖樣模板，並且有「Emote」擔任義務繪師，加上嚟自5間唔同大學或專上院校嘅應援組成員以學生名義聯合申辦呢一個「同人文化市集」攤位，收6蚊港紙工錢喺昏暗嘅會場幫大家摺好1架，促成咗呢次義賣「痛巴士」紙模型。
講到呢個活動嘅背景，「京阿尼在港應援組」過往會喺年尾收集香港嘅支持者寫畀「京阿尼」嘅心意卡同埋信件，一齊寄去「京阿尼」位於日本京都府嘅本社。今次應援組會代寄2023年新年賀卡，而參加「萌•動同人展 Doujin Fan Fest」期間出售「痛巴士」紙模型嘅全部收益，都會用喺支持呢個行動——而且佢哋仲會喺2023年1月公開相關活動嘅財政報告，極具透明度。
講返架「痛巴士」紙模型本身，巴士模型圖樣模板睇落就係兩車軸版本嘅「萊特日蝕雙子星1型」（Wright Eclipse Gemini 1）…嗱…同人産品嚟嘅，唔好嫌話三次元香港無呢個組合嘅巴士…反正車頭個路線牌上面嘅「375」號路線同埋「慈力共鎮」都唔喺三次元香港存在㗎啦！
至於車身上嘅「拉花」，就係分別嚟自3套「京阿尼」經手製作嘅動畫：
- 門位：《驚爆危機！The Second Raid》（《フルメタル・パニック！The Second Raid》）
- 梯位：《小林家的龍女僕》（《小林さんちのメイドラゴン》）
- 車尾：《紫羅蘭永恆花園》（《ヴァイオレット・エヴァーガーデン》）
筆者覺得代表《紫羅蘭永恆花園》叫你參加「戰後復興」嘅「薇爾莉特·伊芙加登（ヴァイオレット・エヴァーガーデン / Violet Evergarden）同埋代表《小林家的龍女僕》嘅鍾意食嘢蘿莉「小林神奈」就無乜特別需要喺呢度講…反而想講吓代表《驚爆危機！The Second Raid》嘅「狩人清潔有限公司」。
《驚爆危機！》系列嘅故事背景係發生自1998年，三次元世界入面本應喺1990年代初結束嘅「冷戰」因為多種原因而無結束，世界仍然係一個「鐵幕」時代，美蘇兩個超級大國仍然明爭暗鬥緊，世界被鐵幕分成東、西兩大陣營，各個大國之間雖然無大規模軍事行動，但係各個小國之間就不斷發生戰爭衝突，各國嘅情報人員亦進行緊間諜戰，而原本應該係裝甲車同戰鬥直升機做主打嘅戰場，因為出現咗強襲機兵「Arm Slave」而發生巨變。
故事中，幼年遭遇飛機意外，因而喺阿富汗長大嘅男主角「相良宗介」中士係神秘國際組織「秘銀」（ミスリル / Mithril / 米斯里魯）嘅特殊部隊成員，專門喺世界各地即將發生戰爭或者武裝衝突嘅地區執行組織嘅秘密任務，對抗恐怖份子、拯救人質、化解各式各樣危機。
其中，中國受到自8年前嘅「政變」進而爆發內戰（輕小說系列中稱之為「中華南北戰爭」）所影響，被分割成南、北兩個陣營，以長江為界，北面係屬於親蘇聯嘅「人民解放委員會」（簡稱「北中國—北京政府」，自內戰後喺北京成立嘅共產陣營，中華人民共和國嘅法定繼承國），南面就係屬於親西方嘅「中華民主聯合」（簡稱「南中國—廣州政府」）。
而重點係…
香港喺「回歸」中國後分別歸屬上述2個政權，九龍半島以及新界成為「南中國」嘅領土，香港島、大嶼山等離島就成為「北中國」嘅「飛地」，同時協定喺香港禁止進行戰鬥行為。
《驚爆危機！The Second Raid》第10集入面，就講述其中1架強襲機兵「Arm Slave」出沒喺九龍半島搞事，被「南中國」認定「北中國」挑釁佢哋，雙方戰事一觸即發，為咗平息呢次國際糾紛，「秘銀」成員就嚟到香港秘密執行任務。
咁同「富豪大法好」、「西瓜波萬歲」之間嘅糾紛都幾似？！
當中重要嘅一幕就係「相良宗介」中士以「狩人清潔有限公司」（香港島特別區半山區馬己仙峽道2號）掩飾身份游走喺香港，穿越「車都無架」嘅紅磡海底隧道去到九龍…
結果「相良宗介」中士喺暢運道 / 漆咸道南交界因為失神衝紅燈爭啲同1架的士相撞而被軍隊要求落車制服，期間強襲機兵「Arm Slave」突然出現搞事…
咦？情景咁熟口面嘅？
2019年11月，香港警察肆無忌憚咁武力攻擊紅磡香港理工大學，住喺日本嘅香港畫師「星遙 ゆめ」當時喺Facebook發文對比香港理工大學抗爭場面同《驚爆危機！The Second Raid》動畫內容同一地點嘅劇情截圖…
😰
Posted by 星遙 ゆめ on Saturday, 16 November 2019
結果得到《驚爆危機！》系列原著輕小說日本作家「賀東招二」轉發，仲對香港人表示：
「希望大家都平安無事…」
所以話…
香港人當日本係「鄉下」
有時都不無道理
Be the first to comment