二次元偶像生日 粉絲拍攝痛巴 物業管理：你哋有無申請？

隸屬《LoveLive!虹咲學園學園偶像同好會》嘅優木雪菜，早喺2017年4月15號登場於「LoveLive!」系列新企劃《PERFECT Dream Project》（總之唔係某網站話係咩Vtuber），其中人物設定嘅生日日期係8月8日。

隨著2022年一系列偶像「痛巴士」熱潮未退（相關系列正文呢…負責嗰個編輯仲未得閒寫第一句），嚟到8月就有「二過借火！雪菜應援巴士2022！！」企劃組整咗一個優木雪菜生日應援巴士廣告上九巴嘅一架丹尼士Enviro 200單層巴士（車隊編號：AAU10，車輛登記：PW5614），主要會安排行走53號路線（荃灣（如心廣場）←→形點公共運輸交匯處）。

2022年8月8號，適逢係優木雪菜生日「正日」，企劃組就決定搞「線下活動」，包括：

• 派發眾籌回禮明信片（只限眾籌參與者）
• 乘搭應援巴士來回
• 主辦負責人「找數」活動
• 粉絲拍攝及交流

是咁的，即係咁講，喺香港地公開搞二次元活動會被人白眼唔係神奇事，但今次又有啲唔同：

話說喺形點公共運輸交匯處，正當主辦負責人「找數」唱歌、粉絲「打call」、拍攝優木雪菜「痛巴士」期間，形點嘅物業管理人員突然出現！！

「唔好意思，你哋影架巴士有無同九巴申請？或者同我哋公司申請？」

（對方好有禮貌咁問嘅）

至於理由嘛…

「你哋可能會阻住巴士開車」

（其實都有道理嘅）

有現場拍攝嘅巴士迷聞言後表示「巴士總站係公眾地方嚟嘅，喺巴士總站影巴士係唔需要事先申請」，主辦負責人亦表達咗只係簡單嘅攝影，大家又知道巴士嘅開出時間，唔會阻礙巴士總站運作。

形點嘅物業管理人員同現場巴士迷一番交流之後，都無再特別阻撓眾人嘅活動，不過都一直留守直到大家都上晒巴士離開。

巴士台都想奉勸一下各大物業管理公司——其實巴士迷又好、動漫迷又好，呢啲拍攝係正當嗜好嚟，唔需要咁緊張派咁多人嚟「招呼」嘅，由得大家影到夠就會自己和平散去㗎喇！