之前汽車台嗰邊講到，香港山頂纜車有限公司宣佈第5代山頂纜車會喺2021年6月28號正式退役，以進行最後階段嘅升級工程，迎接萬眾期待嘅全新第6代山頂纜車喺2021年年底投入服務。
到咗2021年6月27號，大批想喺最後1日乘搭第5代山頂纜車市民（即係巴士迷術語所謂嘅「送殯黨」）冒雨排隊等候，人龍由臨時月台入口延綿落返去香港公園體育館對開，「打晒蛇餅」。
面對咁多支持者，山頂纜車當然都即時開張枱推銷吓佢哋嘅紀念品啦！例如有紀念版紙車票、別注版康樂棋，仲有特別出品4種口味嘅「手工啤酒」。
到咗下晝13點，山頂纜車召開記者會，香港上海大酒店物業部集團總監孫漫天先生、山頂纜車總經理曾瑛美小姐一同為山頂纜車嘅「青車」車頭特別燈飾舉行亮燈儀式，並且同9位山頂纜車嘅前員工一齊分享工作上嘅趣聞逸事。
孫漫天先生講到：「第5代山頂纜車喺1989年9月20號開始投入服務，我哋希望藉著今日呢個重要時刻，向支持我們嘅公眾致意，並感謝所有曾經乘搭第5代山頂纜車嘅訪客！今日係慶祝山頂纜車即將邁向新里程嘅重要一日。十分榮幸我能夠喺過去32年同山頂纜車一同經歷各個難忘時刻，當中包括1997年全面重建凌霄閣以及山頂纜車總站、2007年4個中途站以及花園道山頂纜車總站嘅改建工程，以及啟用山頂纜車歷史珍藏館等。今日好高興可以同大家一齊見證第5代山頂纜車退役嘅歷史軌跡。」
曾瑛美小姐表示：「山頂纜車自1888年起服務香港市民以及全球旅客，係香港最歷史悠久嘅公共交通工具。對於我同埋所有山頂纜車員工嚟講，呢啲係一段精彩絕倫嘅時光。第5代山頂纜車喺過去30幾年陪伴幾百萬香港人渡過各個重要時刻，並接待過1億3800萬香港市民以及嚟自世界各地嘅旅客，當中不乏知名公眾人物，包括成龍、楊紫瓊、Joanna Lumley、Michael Palin、NBA球星Kobe Bryant、前英國足球員Michael Owen、韓國男團組合GOT7等。我哋感謝所有香港市民以及旅客同埋山頂纜車共同編織出難忘回憶，並期待喺未來繼續同大家攜手前行。」
為咗感謝選擇喺第5代山頂纜車最後服務日乘搭山頂纜車嘅乘客，每名購買實體車票嘅乘客除咗有1張特別版車票之外，山頂纜車公司仲隨機咁向乘客派發1套4款嘅特別車票套裝留念。
每當山頂纜車第5代車卡駛入總站，喺月台上守候嘅市民都紛紛舉起相機同埋手提電話，紀錄低呢個即將離開嘅「香港老朋友」。
由於等候上車嘅乘客眾多，山頂纜車嘅職員需要計好每個車廂座位數目嚟放人入相應嘅月台，而孫漫天先生同埋曾瑛美小姐都向多班山頂纜車上嘅乘客揮手致意。
孫漫天先生同埋曾瑛美小姐亦主動迎接訪客登上第5代山頂纜車，仲同部份乘客寒暄幾句，了解乘客嘅意見。
當問到孫漫天先生點睇香港市民對特別拉花嘅反應，佢不諱言「身處香港呢個國際城市，高估咗香港人對西方文化嘅認識，尤其香港人缺乏『幽默感』嘅程度…本身諗住作為1個舉世知名嘅『香港代表』，希望可以用車身上嘅畫作，向世界宣揚香港文化同埋展示香港本土藝術家嘅功架，可惜無諗過最先唔肯接受香港藝術家嘅，竟然會係香港人。」
雖然輪候咗好長時間而令唔少市民略有微言，但當乘客上到山頂纜車第5代車廂之後都好興奮，紛紛向現場工作人員以及傳媒記者揮手歡呼。
而選擇去中途站欣賞山頂纜車第5代車廂行駛英姿嘅市民，亦企滿山頂纜車嘅中途站，山頂纜車嘅司機要每程車都多次發出手號、閃動車頭燈、響咹提示大家唔好樂極忘形。
每當有山頂纜車班次埋站，乘客落車後都係月台流連「打卡」，平時或許好快已經有職員「驅散」，但喺最後嘅呢一日，只要大家都小心留喺安全嘅位置，小心留意纜車出入，職員都會畀大家喺月台留多陣開心吓。
除咗凌宵閣嘅總站之外，山頂一帶嘅芬梨徑、白加道站都人頭湧湧，幸好呢一日大家都守規矩，無再次有人擅闖路軌。
香港本地插畫師小肥蟻亦有喺當日去到白加道站，繪畫低第5代山頂纜車嘅情景。
換轉個角度，返落山又會見到啲乜呢？
當然首先同樣係沿途有唔少人「打卡」，不過更重要嘅係其實平時山頂纜車嘅乘客座椅全部都係背向山腳，如果無刻意倒轉身望，就會錯過咗山頂纜車路軌2個重點景點：
- 「青車」同「白車」相遇位
- 保存喺麥當勞道站附近香港山頂纜車倉庫嘅1959年款香港山頂纜車車廂
由於想喺最後1日乘搭第5代山頂纜車嘅市民實在太多，為免運力唔足夠接載落山乘客落山，山頂纜車公司喺黃昏決定當晚20點喺花園道站「截龍」――唔接受市民用八達通卡直接拍卡入閘，乘客必須持有預先購買咗嘅車票先至可以入閘。而未有預先購買車票嘅乘客就需要去售票處購買車票，職員會講明當時購買嘅車票係只有上山而無落山，乘客需要自行另覓方法落山。
凌宵閣山頂站就加派職員喺閘口，提醒乘客尾班車一定會喺22點準時開車，絕不加班，並且確保只有持有事先購買咗回程車票嘅乘客先至可以入閘。
當臨近第5代山頂纜車嘅終極尾班車，大批市民一直喺凌宵閣山頂總站月台上聚集，因為當時埋站嘅係有特別拉花嘅「白車」，好多乘客恐防山頂纜車公司「出蠱惑」而遲遲唔肯上車。
一直在場嘅多名山頂纜車高層需要多番向乘客「保證」呢一架「真係最後一班」，一眾乘客喺2155時先至肯乖乖地上晒車。
期間，曾瑛美小姐同幾名山頂纜車職員列隊，向月台上等候乘搭終極尾班車嘅乘客揮手致意。
擾攘一番之後，第5代山頂纜車嘅終極尾班車喺2021年6月27號晚2201時開出，曾瑛美小姐率領多名山頂纜車職員列隊揮手送別。
第5代山頂纜車嘅終極尾班車車廂入面嘅乘客亦都好雀躍，沿途一直歡呼，並且互相拍照留念。
當第5代山頂纜車嘅終極尾班車抵達「下站」花園道總站，技工隨即上車檢查設備，但一眾乘客久未散去，需要多番「驅趕」先至可以清場。
清場就梗係有原因啦！山頂纜車公司為一班員工搞咗個送別第5代山頂纜車嘅派對，當中最特別嘅係山頂纜車公司準備咗一批有第5代山頂纜車圖案嘅糖果，畀參與派對嘅職員留念。
幾個鐘頭之後，山頂纜車公司即晚就安排工程人員，喺6月28號凌晨吊走仍然有特別拉花嘅「白車」。
幸好天公做美，吊運過程極為順利，到清晨4點多啲已經完成――如果大家仲有印象嘅話，2021年6月28號朝早返工繁忙時間，香港各區都落暴雨，香港天文台仲要接連發出黃色、紅色、黑色暴雨警告訊號――但當朝第一滴雨其實係喺工程完成，平板貨車撤退之後先至落，套用老人家嘅「迷信」講法，可能真係做得好事多就個天都會幫你？
事隔1日，2021年6月29號，山頂纜車嘅工程人員已經利用臨時路軌，將「青車」移去保存喺麥當勞道站附近香港山頂纜車倉庫嘅1959年款香港山頂纜車車廂前面，但由於地方淺窄，可以見到就算1959年款香港山頂纜車車廂已經向倉庫門口儘量貼近，但存放咁大架第5代山頂纜車都要搞到2款車「面貼面」。
隨著2021年6月27號最後一班第5代山頂纜車喺22時由山頂凌宵閣纜車總站駛出，服務香港32年嘅第5代山頂纜車正式退役。根據山頂纜車公司資料，第5代山頂纜車最後服務日錄得超過11,000 乘客人次，山頂纜車衷心感謝乘客一直支持，並期待將於2021年底第6代山頂纜車正式投入服務時，再次為大家服務。
山頂纜車暫停行駛期間，市民同埋旅客仍然可以去太平山頂享受大自然風光，欣賞香港山頂遠近馳名嘅壯麗景色。凌霄閣以及摩天台428將照常營業，各間餐廳同埋零售商店將繼續正常營業。
市民及旅客只需於市區乘搭公共巴士、公共小巴或的士便可到達山頂，公共交通工具前往山頂嘅選擇包括：
- 新巴X15號路線（中環（中環渡輪6號碼頭）←→山頂）
- 新巴15號路線 （中環（中環渡輪6號碼頭）／交易廣場←→山頂）
- 港島專綫小巴1號路線（中環(香港站公共運輸交匯處）←→山頂）
- 的士
巴士及專線小巴公司將按需求適時加強服務。
6 Trackbacks / Pingbacks