城巴「超豪」瀕退役 一批巴迷「送殯」忙

城巴喺2018年7~9月由新巴引入21架歐盟3期排放標準嘅富豪超級奧林比安12米版本雙層巴士，以取代城巴非專利部歐盟2期排放標準嘅富豪奧林比安11米／12米版本雙層巴士以及丹尼士三叉戟12米版本雙層巴士。

由於香港運輸處由2020年1月1號開始唔再續牌畀歐盟3期排放標準嘅柴油商業車輛，呢個政策令呢批巴士由2020年開始被強制淘汰而退役。

2021年3月4號，城巴非專利部最後3架富豪超級奧林比安12米版本雙層巴士嘅其中2架（車隊編號：254、258，車輛登記：AC4764、HE152）會喺當晚「收車」後退役，呢2架巴士當日行走中環←→沙田第一城嘅88R號路線，吸引咗唔少巴士迷來回遊河同影相拍片。

去到2021年3月6號，城巴非專利部只淨最後一架歐盟3期排放標準嘅富豪超級奧林比安12米版本雙層巴士（車隊編號：265，車輛登記：KU7650），獲安排繼續服務88R號路線，繼續吸引唔少巴士迷「追捕」。

不過由於機件出現問題，仲據稱曾經喺車程期間突然自己「死火」，巴士車長決定通知工程部人員到中環總站檢查，擾攘大約20分鐘左右，但仍然無辦法修復，最後工程人員喺大約1835時決定將呢架巴士揸走返去車廠。