九巴葵涌「入錯窿」 搞到「晾底」無陰公

2021年3月17號下晝，智能電話通訊軟件群組流傳一啲相片，見到一架九巴雙層巴士喺要入去葵涌邨公共運輸交匯處埋站嘅時候，巴士車長錯誤轉入葵涌商場卸貨區，因為卸貨區入口斜坡較高，巴士就咁「晾底」。

首先講解吓今次失誤嘅背景，「專利巴士」要入去葵涌邨公共運輸交匯處埋站，係會經大窩口道去到近綠葵樓下面嘅專利巴士專用入口（上圖左），但今次巴士車長就錯誤扭入碧葵樓下面嘅卸貨區入口（上圖右）。

由於貨車相對大型低地台巴士嚟講，底盤離地較高，所以卸貨區入口設計上斜度可以唔需要做到巴士站入口咁平，結果就係咁而令到今次扭錯入缷貨區嘅雙層巴士「晾底」喇！

大家睇吓涉事巴士車頭貼實卸貨區入口路面，真係唔需要落斜板都可以畀輪椅上落巴士（⊙＿⊙）

不過應該巴士個下巴都幾痛（T_T）