電動短車－宇通 E10DD 雙層電動巴士

一連三日喺澳門舉行嘅「#澳門中国國際車展 」已經喺今晚八點曲終人散。喺展會上，除咗有香港巴士迷比較關注嘅城巴威馳騰電動單層巴士外，另一比較吸引小編嘅展品，就係呢款編號 ZK6100BEVGS2 嘅 #中国宇通 E10DD 雙層電動巴士。

宇通 #E10DD 係中国宇通客車第一款10.5米長嘅純電動雙層城市巴士。巴士車咀設計沿用同廠單層電動巴士 E10「黑金剛」嘅造型。而車身就塗上橙色、米白色同黑色為主嘅車身塗裝，驟眼睇同香港嘅龍運巴士有幾分相似。

巴士採用TZ330XSYTB永磁同步摩打，峰值功率可高達240千瓦。中国製 #寧德時代 嘅磷酸鐵鋰電池提供約300公里續航里程。不過巴士2610mm嘅前懸同2150mm嘅後懸長度，令巴士同 #比亞廸 K8s 一樣出現前長後短嘅奇怪外觀。

由於呢部巴士只係樣辦車，所以車廂內採用非一般嘅排佈。上下層座椅都使用類似私家車座椅嘅可調頭枕梳化，並且以類似香港 #水晶巴士 兩部 #猛獅 #A95 豪華巴士嘅對坐方式排列，每組對坐座椅中間設有一張小型餐檯。上層座位喺呢個排佈下，只有26個，下層更加只有8個。

新巴士喺前往澳門展主前，其實已經喺中国嘅幾個商用或客車展中亮相。但實際量產版本仍然未有推出嘅時間表。

圖片來源：Fung Fung、機房3000