「浪卡」漸遠離香港 「睇風」阻巴士恢復

熱帶風暴「浪卡」喺香港以南掠過，香港天文台喺2020年10月13號日間發出8號東北烈風或暴風信號。

一如以往，有市民去到「睇風」勝地――尖沙咀碼頭――感受「打風係點樣」。由於專營巴士公司一早公佈日間唔會提供服務，所以部份「睇風」嘅市民大安旨意咁揸車到場，仲擺低啲車喺尖沙咀碼頭巴士總站範圍。

但隨著香港天文台預計喺黃昏改發3號強風信號，各間公共巴士公司由1830時開始逐步恢復服務。

然而，可能因為太投入「睇風」，市民無留意公共巴士即將恢復，因此未及時離開，首批去尖沙咀碼頭準備嘅九巴雙層巴士喺大約1712時到達之際，就被阻塞。

經在場清潔工人協助，逐個司機「捉」返去揸走啲車，擾攘咗10幾分鐘，準備恢復服務嘅巴士終於成功入到尖沙咀碼頭巴士總站。

其後有警員喺1845時到場驅趕同票控未走嘅司機。