陣風襲來樹木倒 途經巴士被扑到

2020年9月17號朝早，一如之前幾日嘅情況，天氣變幻莫測，香港天文台早喺朝早6點20分發出特別天氣提示，指「預料高達每小時80公里或以上的強陣風吹襲香港」。

去到朝早7點幾，薄扶林道近蒲飛路交界，風雨之中有1棵大約10米高嘅樹突然倒塌，擊中3架途經嘅車輛，包括1架雙層巴士、1架小巴、1架的士，並且造成1名的士司機同埋1名巴士乘客合共2名男子受輕傷，由救護車送院。

因應今次意外，薄扶林道近蒲飛路往香港仔方向一度全線封閉，而往中環方向亦一度實施單線雙程行車措施。

消防接報後，除咗搶救傷者之外，亦派員鋸斷倒冧嘅樹木清理現場，到朝早8點左右薄扶林道近蒲飛路往香港仔方向已經可以重開快線，而到9點已經全線重開。

至於今次被冧樹扑中嘅雙層巴士，係1架由城巴「過檔」新巴嘅ADL Enviro 500 MMC 12米版本雙層巴士（車隊編號：8386→5745，車輛登記：SP4910），當時行緊新巴970號路線去數碼港，事發後車頭下層擋風玻璃碎裂，左右兩側「A柱」折斷，幸好巴士車長無恙。

（照片撮自突發事故群組）