愉景灣以巴代船 單層巴士仲係輸

話說2020年9月17號朝早，愉景灣交通旗下又有渡輪故障，佢哋晨早7點發出告示，指由朝早7點開始，愉景灣渡輪只可以維持每30分鐘一班，建議去中環嘅乘客改搭DB08R號居民巴士。

愉景灣渡輪又壞 居民巴士要乖乖

根據要求署名「大柴三星機頭佬」嘅愉景灣居民表示，除咗原本安排平日加開2班晨早特別班次：0750、0805單向由愉景灣開往中環之外，愉景灣交通仲加開咗0740、0820嘅班次。

據佢所講，原本佢搭開0820嘅渡輪，佢見到廿幾名原本想搭渡輪嘅乘客喺愉景灣總站轉坐DB08R號居民巴士，而佢知道之前實測過居民巴士唔會快得過渡輪，所以都係安心等0830嗰班渡輪出中環。

愉景灣中環巴士 實測慢過搭渡輪？

結果唔使多講，即使愉景灣交通用咗單層巴士，0820開嘅居民巴士都仍然係比起0830開嘅渡輪遲啲先至去到中環3號渡輪碼頭。

又…當然…因為佢份工唔使咁早「打卡」，所以就安心喺碼頭等埋架巴士「打卡」（●v●）

如果有朝一日，愉景灣交通突然話全日都用居民巴士代替渡輪…哈哈…哈哈哈…