中華汽車（中巴）發表公告，指創辦人之一顏成坤嘅長子、公司副監理及執行董事顏傑強喺2020年8月15號逝世，享年85歲，但中巴公告未有透露顏傑強逝世原因。
顏傑強自1961年擔任中巴董事，並喺1967年獲委任為公司副監理。董事局稱，全體成員對顏傑強多年來作出寶貴貢獻表示衷心感謝，並向其家人表示最深切慰問。
顏傑強年幼時就讀拔萃男書院，其後曾先後入讀底特律理工學院、加州大學洛杉磯分校，並喺西太平洋大學取得工商管理博士。
傳聞以「英國貴族」自居嘅中巴太子顏傑強，曾多次表達自己對經營中巴缺乏興趣，又曾經形容巴士服務係「邋遢生意」。
1983年顏傑強被廉政公署起訴，指他以過高價格為中巴購入輪胎，從中收取佣金50萬蚊，地區法院聆訊5星期後，最終因證據不足而獲釋。
顏傑強對生活極為講究同奢侈，嫌棄位於柴灣嘅中巴總部車廠位置偏遠兼裝修殘舊，曾長租已結業嘅銅鑼灣怡東酒店行政套房。
顏傑強素來被傳出手闊綽，酒店泊車員每次「貼士」都以百港元計，曾經有怡東酒店商務餐廳侍應手頭緊，顏傑強就即打賞1000蚊，豪氣滿臉。
關於中巴
中巴早喺1920年代由顏成坤同黃旺財成立，並且係1933年香港實施專營巴士制度時同九龍汽車（九巴）一同獲得「專營權」，中巴拎住44架巴士搞7條路線，早期對於香港巴士業務相當進取。
中巴創辦人之一嘅顏成坤由第二次世界大戰之後更不斷購買物業、巴士、廠房，更加喺1962年根據《一九六○年交通事務（港島）法案》規定，將25%股票喺香港「上市」。
其中令巴士迷津津樂道嘅係中巴率先為香港引入後置引擎雙層巴士――即係經典嘅「珍寶巴士」。
不過自從1980年代開始，除咗出現地鐵打擊公共巴士業務，香港「前途問題」未明朗，令顏氏家族無乜心機再注資加強巴士業務，服務也因而大幅倒退。
去到1990年代初，由於顏成坤年事已高，業務交由3名子女――顏潔齡、顏傑強、顏亨利（顏傑文）――打理，但眾所周知佢哋對巴士業務毫不熱衷…佢哋著眼喺中巴持有嘅唔少車廠、員工宿舍土地，開始逐步出售或者聯同發展商改建成地產項目。
顏成坤2001年辭世，顏潔齡、顏傑強、顏亨利理所當然咁掌管公司，業務僅剩香港、英國物業發展及投資。
隨著「北角政府合署←→港運城」穿梭巴士服務喺2015年6月30號「收車」後結束，中巴個名仲係China Motor Bus…但係實質業務已經變成「地產公司」：
- 北角港運城 = 中巴舊北角車廠
- 北角港濤軒 = 中巴舊員工宿舍。
至於中巴柴灣巴士廠地皮，早喺2015年獲得城規會批准更改土地用途，顏氏家族同太古合作，拆卸巴士廠並重建做商住項目，總樓面約69.2萬方呎，預計整個項目涉資超過100億港元。
中巴近40年代起屢受狙擊，包括1980年代鷹君集團創辦人羅鷹石次子羅旭瑞曾出手「掃貨」，近年則屢遭基金股東逼宮，但每次都被中巴成功擊退。
究竟中巴今後何去何從？或許真係要考慮改名做「中華地產」…
Be the first to comment