心急諗住快一時 的士攔腰撼巴士

2020年6月23號朝早8點前少少，喺九龍佐敦發生一宗牽涉到一架九巴嘅輕微車禍。

事發喺渡船街同佐敦道交界，涉及一架市區的士同埋一架九巴雙層巴士。據現場途人所述，當時九巴雙層巴士由西九龍站嗰邊沿佐敦道東行，去到渡船街交界時突然被一架的士攔腰撞埋落車門，途人指唔排除係有人唔跟交通規則行車引致。

現場所見，被撞嘅九巴雙層巴士係一架隸屬沙田車廠嘅12米版本E500（車隊編號：ATENU922，車輛登記TY5921），落車門玻璃被撞到粉碎，門框變形，側邊車身有刮痕；至於嗰架市區的士就係一架4乘客座位版本嘅豐田金丰，右邊車頭有明顯損毀，車頭燈甩咗，引擎蓋拱起。

事發後警方好快派出環頭巡邏車到場處理，簡單記錄之後迅即要求涉事車輛擺埋一邊，恢復交通。

另外值得一提嘅係附近負責掃街嘅工友，亦好快到場清掃馬路上嘅碎片。