遲到理由一大籮 做乜賴落巴士囉

是咁的，話說LIFE Mart 手作市集喺2020年6月20 – 21號去到長沙灣D2 Place一期2樓The Space搞咗個《100個遲到的理由 主題市集》。

其中一個項目係「100個遲到的理由展覽」，主辦組織早前收集咗市民嘅遲到理由投稿，大約有 135 則投稿，而展覽亦設有「即場投稿區」，畀參觀者即場發表遲到理由。

至於有乜遲到理由係比較有共鳴？

地鐵塞車、爆呔，係1980年代港產片經典搞笑台詞之一，但又有幾多人諗過去到今時今日，搭地鐵係可能有著制服嘅恐怖份子打乘客？

無咗班巴士…應該都算常見啩？依家係睇到站時間預報都會被巴士公司整蠱嘅時代，都真係幾慘。

如果搭巴士時有人無啦啦對住自己笑，又真係幾驚，但望車窗應該都知係去到邊個站啩？

天時暑熱，喺巴士站等巴士真係一定會出汗，加上依家啲巴士冷氣經常開唔足，沖涼又有乜用？

近來屯門公路又係日日派彩，但傳說中嘅「屯門牛」幾時有出現過？

呢啲就真係巴膠先至明，遇上個唔識操控車速嘅「碌神」或者著壞嘢燈嘅MMC…一般街客都只會統一稱呼做「巴士佬玩嘢正一hihi」。

一句到尾，如果約咗人而又要搭巴士到場，其實自己係有責任提早一啲去巴士站等，巴士出站之後，畀你上車係人情，撇甩你係道理…「巴士唔係用嚟追㗎！」