【英國巴士】肺炎致乘客銳減 政府注資保服務

受到新型冠狀病毒（武漢肺炎）持續擴散所影響，英國公眾搭巴士嘅人次大減，英國政府喺2020年4月3號宣布，將會投入近1.7億英鎊資金畀英格蘭地區嘅巴士公司，務求保障各巴士公司可以持續服務有需要人士。

英國政府發表聲明表示呢項援助將保障公共巴士能夠確保無辦法「在家工作」嘅人往返工作地點。

英國交通大臣Grant Shapps表示：「對於需要出門工作或者購買食物嘅人、以及我哋嘅緊急服務同埋國家醫療保健服務嘅員工嚟講，巴士係佢哋嘅命脈。我哋竭盡所能保持呢個行業運作至關重要。呢項耗資上億英鎊嘅投資，將保護英格蘭各地至關重要嘅運輸聯繫，長遠去睇，呢項投資將支撐呢個行業、並且減少干擾乘客。」

英國交通部補充，將會要求公共巴士營辦方維持服務班次，達到平常營運車次一半。

公共巴士營辦方仲必須預留適當空間，令乘客可以保持足夠「社交距離」，仲要持續通知乘客修訂過後嘅班次時間表。

英國財政大臣Rishi Sunak表示：「最重要嘅係，一般人應該喺疫情爆發期間留喺屋企，以保護我們嘅國家醫療保健服務，但我們都需要確保醫生、護士同埋其他重要嘅工作人員，能夠往返工作地點。」