【美國巴士】比亞迪質素差劣 巴士公司斬合約

美國印第安納州印第安納波利斯嘅公共巴士營運方IndyGo，2020年2月27號召開董事局會議，會議中決定取消一份向比亞迪再購買5架電動巴士嘅合約。

事源係當初比亞迪指所出售嘅電動巴士，每次完全充電後可以行到275英里，但IndyGo收貨後發覺實際上巴士續航力遠少過比亞迪所講，令到原本為當地13英里長嘅39號路線而買嘅31架電動巴士要全數出街先至勉強維持到服務，無法預留「後備巴士」。

同一時間，當IndyGo提出想喺巴士路線中間加設充電設施改善電動巴士續航力，比亞迪卻係不置可否。

對於比亞迪產品同服務如此「優秀」，IndyGo董事局決定取消之前同比亞迪簽訂價值640萬美元、再購買5架電動巴士嘅合約。

至於替代品，加拿大嘅New Flyer曾經畀IndyGo試用1架電動巴士，但因為New Flyer嘅承諾續航力較比亞迪所講少一半，加上New Flyer未能承諾保證零件供應，所以IndyGo未有採購New Flyer產品。

取而代之係IndyGo向美國加州嘅Gillig採購13架40呎長油渣巴士，合約總值750萬美元。