2020年2月14號，港鐵屯馬線一期正式通車，將原有馬鞍山線由大圍站經顯徑站、鑽石山站延伸到啟德站，清晨0520時開門，0545時加開一列「頭班車」（正式頭班車開0612時），由啟德站開往烏溪沙站。
如果搭到頭班車，港鐵都有送少少紀念品嘅：
情人節流流當然有朱古力，但送「散」紙包匙扣同埋免費「單」程車票…（＝＿＝）”
啟德站作為新嘅尾站，望吓佢個基本設計係點…
根據港鐵所講，啟德站嘅出入口設計成流線型去增添動感，並且外牆同頂部裝咗玻璃，採集天然光，但到通車之時…
「好驚被人『裝修』呀~所以用金屬板封咗外牆啲玻璃先！」
港鐵喺啟德站入面貼咗啲「鐵仔」提提大家屯馬線一期喺呢一日通車…其實同「高捷少女」一比較…（＝＿＝）
啟德站大堂，就一眼望晒，典型港鐵 瘋 風格，10間商舖、廣告燈箱、閘機一眼望埋去都係無特別驚喜…係閘機畀乘客拍八達通卡嗰個位加裝咗防火厚膠板覆蓋。
但係有樣嘢可以講吓…呢件嘢叫客務中心…無錯…就係下面幅圖咁…原本個設計係有職員嘅客務中心，但因應2019年香港「反修例抗爭」期間有人多次破壞港鐵站，啟德站依家改用智能客務中心，用聚碳酸酯包住，唔再有職員吓吓兜口兜面畀大家鬧。
咁想問嘢時點算好？（⊙＿⊙）嗱，即係咁…嗰件嘢：
- 設有特大屏幕顯示天氣同車務訊息畀乘客睇…
- 查詢行程同車站資訊係有固定版MTR mobile…
- 召喚專線係視像通話系統，乘客可以靠佢駁去搵位於金鐘嘅港鐵職員詢問
係咪 好似 好先進咁款呢？ （^++++^）y
至於「買飛」，當然係之前被人以為係「太陽能電筒」嘅售票增值機…而查閱機，屏幕比較以前嘅款式無咁難閱讀，仲有列印功能（唔使畀便利店賺3蚊）
整體上講，啟德站大堂算簡單易行，不過令唔少街坊不斷提問嘅係：「出口有A、B、D，咁C出口喺邊？」
原來現時C出口只係一個「預留位」，將來連接上蓋發展項目同埋啟德新發展區嘅地下街，大家等多幾年啦！
講到啟德站有幾方便呢~暫時就真係「算吧啦」…依家由個站行出嚟，最先見到都只係一堆地盤，乘客要行圍板之間嘅臨時行人通道，夜晚行都唔好咁老定。
另外講吓「啟德」嗰兩隻字，佢哋係地鐵公司退休建築師區傑棠所寫嘅書法字，啟德站應該係第一批唔屬於原地鐵系統而印有書法字嘅車站。
港鐵近年自詡「皇恩浩盪」嘅「轉乘優惠」，啟德站都有嘅，使用成人八達通卡喺啟德站轉搭以下路面公共交通係會有1蚊優惠：
- 九龍綠色專線小巴：49
- 城巴：20、22、22M
- 九巴：3B、5、5A、5C、5D、11X、26、28
臨尾講吓一個港鐵以為好前衛先進嘅嘢：QR code教乘客搵路…
拎架智能電話掃描咗個QR code、喺跳出嘅畫面揀好要去嘅地方…
好嘢…跳去Google Map…係唔識教你行唔係街道嘅行人通道㗎！大家跟著行就會兜遠咗㗎喇！
所以都係嗰句：「党铁？不了！」
1 Trackback / Pingback